Telangana Politics: ఏడాదిలో ఇన్నిసార్లా.. కుర్చీలాటలో బలయ్యే ఐదుగురు మంత్రులెవరు?

రాజకీయాల్లో ఏదీ శాశ్వతం కాదు..ముఖ్యంగా ‘కుర్చీ’ చుట్టూ తిరిగే కథల్లో! అధికారంలోకి సరిగ్గా రెండేళ్లు కూడా కాలేదు, అప్పుడే తెలంగాణ కాంగ్రెస్ (Telangana Congress) మంత్రివర్గంలో కుర్చీలాట మొదలైనట్లు జోరుగా ప్రచారం సాగుతోంది. ఎన్నికల విజయంతో హుషారు మీదున్న సీఎం రేవంత్ రెడ్డి (CM Revanth Reddy), పెరుగుతున్న తట్ట లాంటి సమస్యలను పక్కన పెట్టి, ఇప్పుడు పదవుల పంపకంపై దృష్టి సారించినట్లు తెలుస్తోంది.

విశ్వసనీయ వర్గాల సమాచారం ప్రకారం, మరో వారం పదిరోజుల్లో కేబినెట్‌ (Telangana Cabinet)లో నలుగురు లేదా ఐదుగురు మంత్రులపై వేటు పడడం ఖాయమని, కొత్తవారికి పట్టం కట్టబెట్టడం తథ్యమని రాజకీయ పండితులు గుసగుసలాడుకుంటున్నారు. ఈ మార్పుల్లో అందరి దృష్టినీ ఆకర్షిస్తున్న అంశం కోమటిరెడ్డి సోదరుల వ్యవహారం. ప్రస్తుతం మంత్రిగా ఉన్న అన్న కోమటిరెడ్డి వెంకటరెడ్డి (Komatireddy Venkatreddy)ని ఏఐసీసీ (AICC) వైపు పంపించి, ఆయన స్థానంలో తమ్ముడు కోమటిరెడ్డి రాజగోపాల్ రెడ్డి (Komatireddy Rajagopalreddy)కి మంత్రి పదవి ఇవ్వాలనేది హైకమాండ్ ఆలోచనగా ప్రచారం జరుగుతోంది. ‘చింత చచ్చినా పులుపు చావదు’ అన్నట్టుగా తెలంగాణ కాంగ్రెస్ పీఠం చుట్టూ ఈ సోదరుల రాజకీయమే పదే పదే తిరుగుతుండటం విశేషం.

వివాదాల కొండ.. త్యాగాల ఉత్తమ్!

ఇక, మరో ప్రధాన మార్పు రేవంత్ రెడ్డి (Revanth Reddy)కి సన్నిహితుడిగా పేరున్న పొన్నం ప్రభాకర్ (Ponnam Prabhakar) విషయంలో. పొన్నంను ఏఐసీసీ ప్రధాన కార్యదర్శిగా ఢిల్లీ పంపించి, ఆయన స్థానంలో ప్రస్తుతం పీసీసీ చీఫ్‌గా ఉన్న మహేష్ కుమార్ గౌడ్‌ (Mahesh Kumar Goud)కు మంత్రివర్గంలో చోటు కల్పించే ఛాన్స్ ఉందని తెలుస్తోంది. అలా ఖాళీ అయిన పీసీసీ చీఫ్ పదవిని మంత్రి శ్రీధర్ బాబు (Sridhar Babu)కు అప్పగించి, ఆయనకు హోంమంత్రి పదవి కూడా కట్టబెట్టాలని కాంగ్రెస్ యోచిస్తోందట. అంటే, ఇక్కడ ‘పాత సారాబుడ్డీ.. కొత్త లేబుల్’ అన్న చందంగా పదవుల మార్పిడి జరుగుతోందన్నమాట! మంత్రివర్గంలో వివాదాలకు కేంద్ర బిందువుగా మారుతున్న మంత్రి కొండా సురేఖను సైతం తొలగించే అవకాశాలు అధికంగా ఉన్నాయని సమాచారం. ఆమె స్థానంలో ఏళ్ల తరబడి కాంగ్రెస్‌కు సేవలందిస్తున్న ఉత్తమ్ కుమార్ రెడ్డి (Uttam Kumar Reddy) సతీమణి ఉత్తమ్ పద్మావతిని లేదా, సినీ నటి, సీనియర్ నాయకురాలు విజయశాంతి (Vijayashanthi)ని మంత్రివర్గంలోకి తీసుకునే అవకాశాలు మెండుగా ఉన్నాయి. నాకెంతటి వాటాలొచ్చె! అన్నట్లుగా.. సేవకు తగిన ప్రతిఫలం దక్కే సమయం వచ్చిందన్నమాట! అలాగే, ఇటీవల సర్పంచ్ వేలం పాటలపై సెటైర్లు వేసిన జూపల్లి కృష్ణారావు కూడా ఔట్ లిస్టులో ఉన్నట్లు సమాచారం. ఆయన స్థానంలో మల్‌రెడ్డి రంగారెడ్డి (Malreddy Rangareddy)కి అవకాశం దక్కవచ్చు. వీటితో పాటు, ఆది శ్రీనివాస్‌ (Adi Srinvas)ను కూడా కేబినెట్‌లోకి తీసుకోవాలన్న ఆలోచనలో హైకమాండ్ ఉన్నట్లు తెలుస్తోంది.

మతలబు ఏమిటో..?

ప్రస్తుతం సీఎం రేవంత్ రెడ్డితో పాటు 16 మంది కేబినెట్‌లో ఉన్నారు. ఇటీవల మూడు సార్లు కేబినెట్ విస్తరణ జరిగింది (అడ్లూరి లక్ష్మణ్, వాకిటి శ్రీహరి, అజారుద్దీన్). అయితే, త్వరలో చేయబోయే ఈ పునః వ్యవస్థీకరణ వెనుక భారీ రాజకీయ వ్యూహాలు ఉన్నట్లు స్పష్టమవుతోంది. స్థానిక సంస్థల ఎన్నికలు, ముఖ్యంగా హైదరాబాద్ జీహెచ్‌ఎంసీ ఎన్నికలను దృష్టిలో ఉంచుకొని, సామాజిక సమీకరణాలు, ప్రాంతీయ ప్రాధాన్యతలను బేరీజు వేసుకొని ఈ మార్పులు చేయబోతున్నట్లు సమాచారం. మొత్తమ్మీద, ఏ పార్టీ అధికారంలో ఉన్నా, కుర్చీల ఆట మాత్రం ఆగదు అన్నట్లుగా సీఎం రేవంత్ రెడ్డి, హైకమాండ్ ఈ మార్పులు చేర్పులపై పూర్తిస్థాయిలో చర్చించి, పట్టుమని పది రోజులలో కేబినెట్ పునః వ్యవస్థీకరణను పూర్తి చేసే అవకాశముందని రాజకీయ వర్గాలు బలంగా నమ్ముతున్నాయి. ఎవరికి పట్టం? ఎవరికి నిరాశ? అన్నది మరో వారం రోజుల్లో తేలిపోనుంది.

ప్రజావాణి చీదిరాల