Revanth-Jagan: బటన్ నొక్కడమా? బ్రాండ్ పెంచడమా? తొలి ‘సీఎం’ అనుభవం తేడా ఇదే!

తొలిసారిగా ముఖ్యమంత్రి పీఠాన్ని అధిరోహించిన ఇద్దరు గ్లోబల్ స్థాయి లీడర్లు.. ఆంధ్రప్రదేశ్‌లో వైఎస్ జగన్ మోహన్ రెడ్డి, తెలంగాణలో రేవంత్ రెడ్డి. అధికారాన్ని చేపట్టడంలో ఈ ఇద్దరికీ పాలనా అనుభవం శూన్యం. కానీ, వీరిరువురూ తమ తొలి ముఖ్యమంత్రి పదాన్ని వాడుకున్న తీరు, రాష్ట్రాల భవిష్యత్తును మలచిన విధానం మాత్రం ‘ఉప్పూ నిప్పు’ లా ఉన్నాయి. ‘గడుసు పిల్లకు ఏడేళ్లలోపు అన్నీ తెలుస్తాయి’ అన్నట్టుగా, రేవంత్ రెడ్డి తన అతి తక్కువ కాలంలోనే తెలంగాణకు గ్లోబల్ బ్రాండ్‌ను పెంచే పనిలో నిమగ్నమైతే, జగన్ రెడ్డి మాత్రం తన ఐదేళ్ల పాలనను కక్ష సాధింపులకు, వెనుకడుగులకే పరిమితం చేశారు.

ఇటు అభివృద్ధి.. అటేమో..!

సీఎంగా రేవంత్ రెడ్డి తీసుకున్న మొదటి ముఖ్యమైన నిర్ణయం హైదరాబాద్‌లో ‘గ్లోబల్ సమ్మిట్‌’ను నిర్వహించడం. డిసెంబర్ 8, 9 తేదీల్లో జరుగుతున్న ఈ సదస్సుతో, ఆయన తెలంగాణ బ్రాండ్ వాల్యూను ప్రపంచానికి పరిచయం చేస్తూ, రాష్ట్ర ఆర్థిక పురోగతికి బాటలు వేశారు. ఉద్యోగం ముందుంటే ఉపాధి వెనుకుండదా? అన్నట్టుగా, పారిశ్రామిక ప్రగతి ద్వారా ఉపాధి కల్పనపై ఆయన దృష్టి సారించారు. దీనికి పూర్తి విరుద్ధంగా, 2019లో ముఖ్యమంత్రిగా బాధ్యతలు చేపట్టిన జగన్ రెడ్డి తన తొలి అనుభవాన్ని ‘మూడు ముక్కలాట’కు (మూడు రాజధానుల అంశం), రాజకీయ కక్ష్య సాధింపులకు వినియోగించారు. అంతర్జాతీయంగా సన్‌రైజ్ సిటీగా గుర్తింపు పొందిన అమరావతిని ముంపు ప్రాంతమంటూ ప్రచారం చేసి, ఆంధ్రా బ్రాండ్ వాల్యూను దిగజార్చారు. రేవంత్ ఫ్యూచర్ సిటీ నిర్మాణం అంటూ ముందుకు సాగితే, జగన్ రెడ్డి పాలన అమరావతి కూల్చివేతతో ఆంధ్రప్రదేశ్ భవిష్యత్తును దెబ్బ తీశారు.

తాళాలు బద్దలు కొట్టి..

పాలనపై ఈ ఇద్దరు గ్లోబల్ లీడర్ల వైఖరి వారి తొలి అడుగులోనే స్పష్టమైంది. జగన్ రెడ్డి తన పాలనను ప్రజల సమస్యలు వినే ప్రజావేదిక కూల్చివేతతో మొదలుపెట్టారు. అప్పుడు తెలుగులో సాటివాడిని చూడకుండా సొంత కన్ను పొడుచుకున్నట్టు ఉంది ఆయన చర్య. దీనికి భిన్నంగా, రేవంత్ రెడ్డి ప్రజలకు అనుమతి లేని, ఇనుప సంకెళ్లతో కంచె వేసిన ప్రగతి భవన్ తాళాలను బద్దలుకొట్టి పాలనలో తన మొదటి అడుగు వేశారు. ప్రజల పక్షాన నిలబడతానని బలంగా ప్రకటించారు. ముఖ్యమంత్రిగా తొలి అనుభవమే అయినప్పటికీ, జగన్ తన ఐదేళ్ల ప్రభుత్వంలో ఒక్కసారి కూడా రాష్ట్ర ప్రగతిని ప్రపంచానికి చాటేలా ఇటువంటి ప్రతిష్టాత్మక సదస్సులను నిర్వహించలేకపోయారు. ఆయన దృష్టిలో పాలన అంటే కేవలం సంక్షేమ పథకాల పంపకాలు, దానికోసం బటన్ నొక్కే కార్యక్రమాలు నిర్వహించడం. పని లేని మంగళి పిల్లి తల గొరిగినట్టు అన్నట్టుగా, ఆయన దృష్టి రాష్ట్ర ప్రయోజనాల కన్నా ప్రత్యర్థి పతనానికే పరిమితమైంది. ‘వై నాట్ 175’ అంటూ సంక్షేమం చుట్టూ రాజకీయాలు నడిపారు.

ఇద్దరూ స్టార్సే కానీ..

కానీ, రేవంత్ రెడ్డి పాలన అంటే కేవలం సంక్షేమం మాత్రమే కాదని, రాష్ట్ర పారిశ్రామిక ప్రగతి, ఉపాధి ఏర్పాటు, ఉద్యోగాల కల్పన అని నిరూపిస్తున్నారు. ప్రత్యర్థులపై రాజకీయ కక్ష సాధింపులకు సమయం వృథా చేయకుండా, రాష్ట్ర ప్రగతికి నడుంబిగించారు. వందల మంది సలహాదారులు, వేల మంది ఐ-ప్యాక్ సభ్యులతో రాజకీయం చేసిన వైసీపీకి భిన్నంగా, రేవంత్ తన అభిప్రాయాలను అధిష్టానం నిర్ణయాలకు జోడించి, పార్టీలో, ప్రజలలో వ్యతిరేకత లేకుండా పాలన సాగిస్తున్నారు. నిజమే, ఇద్దరూ గ్లోబల్ స్టార్సే. కానీ రేవంత్ ది రాష్ట్ర అభివృద్ధికి మార్గం చూపితే, జగన్ ది రాష్ట్రానికి తిరోగమనానికి బాటలు వేసింది. ఈ తేడాను చరిత్ర కచ్చితంగా గుర్తుంచుకుంటుంది.

ప్రజావాణి చీదిరాల