Revanth Reddy: కేటీఆర్ ఉచ్చులో రేవంత్.. లీకైన మాస్టర్ ప్లాన్.. కేబినెట్‌లో భూకంపం!

ప్రభుత్వ రహస్యాలు గోడలకే చెవులు పెడతాయంటారు. కానీ, తెలంగాణ కేబినెట్ (Telangana Cabinet) సమావేశంలో తీసుకున్న అత్యంత గోప్యమైన నిర్ణయాలు, సమావేశం ముగియకముందే బీఆర్ఎస్ (BRS) వర్కింగ్ ప్రెసిడెంట్ కేటీఆర్‌ (KTR)కు ఎలా తెలిశాయి? ఇదే ప్రశ్న ఇప్పుడు కాంగ్రెస్ మంత్రుల (Congress Ministers)ను కలవరపెడుతోంది. ముఖ్యమంత్రి రేవంత్ రెడ్డి (CM Revanth Reddy) నేతృత్వంలో గుట్టుచప్పుడు కాకుండా ‘కుంభకోణం’ చేద్దాం అనుకున్నారనే మాట, లీకై ప్రతిపక్షానికి అస్త్రంగా మారడంతో మంత్రులు ఆవేదన వ్యక్తం చేస్తున్నారట. దీని వెనుక కేటీఆర్ పన్నిన పక్కా ఉచ్చు ఉందా? లేక కాంగ్రెస్ పార్టీ (Congress Party)లోని అంతర్గత కుమ్ములాటలే కారణమా? అన్నది తెలియట్లేదట.

ఏది నిజం..?

ప్రస్తుతం తెలంగాణ రాజకీయాల్లో (Telangana Politics) ప్రకంపనలు సృష్టిస్తున్నది హైదరాబాద్ ఇండస్ట్రియల్ ల్యాండ్ ట్రాన్స్‌ఫర్ పాలసీ (HILTP). ఈ పాలసీ పేరిట రూ.10 లక్షల కోట్ల విలువ చేసే సుమారు 9500 ఎకరాల పారిశ్రామిక భూమిని రేవంత్ ప్రభుత్వం (Revanth Government) ఏకంగా రూ.5-6 లక్షల కోట్లకే అమ్ముకోవాలని ప్లాన్ చేసిందనే ఆరోపణలు వెల్లువెత్తుతున్నాయి. ‘తెలంగాణ ప్రజలకు సంబంధించిన సొమ్మును నువ్వు ఎలా అమ్ముకుంటావ్ రేవంత్ రెడ్డి?’ అంటూ ప్రతిపక్షం నిలదీస్తోంది. ఒకవైపు రాష్ట్రంలో శ్మశాన వాటికలు కట్టడానికి, పేదలకు ఇళ్లు కట్టడానికి భూమి లేదని చెబుతూ, మరోవైపు ఉన్న భూములను అత్యంత రహస్యంగా అమ్ముకోవడానికి ప్రయత్నించడంపై సర్వత్రా విమర్శలు వెల్లువెత్తుతున్నాయి. ప్రజల బాగోగులు, ఎన్నికల హామీలు నెరవేర్చడం చేతగాక, అడ్డదారిలో భూములను అమ్ముకుంటే ఊరుకునేది లేదని కేటీఆర్ హెచ్చరించారు. ఈ ల్యాండ్ డీల్‌పై కేటీఆర్ చేసిన విమర్శలు రేవంత్ రెడ్డిని పూర్తిగా ఇరకాటంలో పడేశాయి.

కేబినెట్‌లో సీఎం అసహనం?

HILTP పాలసీ నిర్ణయం ముందే కేటీఆర్‌కు ఎలా తెలిసిందనే అంశంపై కేబినెట్ భేటీలో ముఖ్యమంత్రి రేవంత్ రెడ్డి తీవ్ర అసహనం వ్యక్తం చేశారని సమాచారం. రూ.5 లక్షల కోట్ల భూ స్కాం గురించి మీడియాలో వార్తలు రావడంపై ఆయన అసంతృప్తి చెందారని తెలుస్తోంది. ప్రభుత్వ నిర్ణయాలు ఇలా లీకైతే మనం సర్దేసుకోవడమేనంటూ మంత్రులకు క్లాస్ తీసుకున్నారట. మంత్రుల్లోనే ఎవరో ఒకరు లీక్ చేశారని ఆయన తీవ్ర అనుమానం వ్యక్తం చేశారట. పరిస్థితి చేయిదాటిపోతుందని గ్రహించిన సీఎం, ఎలాగైనా HILTP పాలసీ కేబినెట్ నిర్ణయం అనేలా ప్రజల్లో ప్రచారం చెయ్యాలని హుకుం జారీ చేశారట. రేవంత్ ఆదేశాలతో రంగంలోకి దిగిన ఆరుగురు మంత్రులు, ఈ పాలసీపై ప్రెస్‌తో మాట్లాడారట. అయితే, ముఖ్యమంత్రి సొంతంగా ఈ పాలసీలు నిర్ణయించడంపై సీనియర్ మంత్రుల్లో కొందరు పెదవి విరిచినట్లు అంతర్గత వర్గాల సమాచారం.

సీఎంకు ముప్పు ఇంటి నుంచే!

మొత్తానికి, కేటీఆర్ పన్నిన ఉచ్చులో రేవంత్ రెడ్డి చిక్కుకున్నారనేది సుస్పష్టం. అయితే, ప్రస్తుతం రాష్ట్ర రాజకీయాల్లో ఈ లీకేజీ వ్యవహారం, ఆ భూముల కుంభకోణం ఆరోపణల కంటే పెద్ద పెను సంచలనంగా మారిందట. కేబినెట్ భేటీలో జరిగిన చర్చలు, తీసుకున్న అత్యంత గోప్యమైన ఆర్థిక నిర్ణయాలు వెంటనే ప్రతిపక్ష నేతకు చేరడం అనేది ముఖ్యమంత్రి రేవంత్ రెడ్డికి వ్యక్తిగతంగానే కాక, పాలనపై విశ్వసనీయతకు కూడా పెద్ద దెబ్బట. ఇది ఎంతవరకు నిజమో తెలియట్లేదు కానీ, ఈ లీకేజీ వెనుక కాంగ్రెస్ పార్టీలోని అసంతృప్త వర్గమో లేదా పాత ప్రభుత్వంలో మిగిలిపోయిన కోవర్టులో ఉన్నారనే అనుమానాలు బలపడుతున్నాయి. ఒకవేళ ఇదే నిజమైతే, సీఎం మొదట ఆ కోవర్టు ఎవరో పట్టుకుంటే మంచిది సుమీ! లేదంటే, రహస్యాలు ప్రతి గంటకూ బయటపడుతూ, ప్రభుత్వం తీసుకునే ప్రతి నిర్ణయం అమలుకు ముందే ప్రతిపక్షానికి అస్త్రంగా మారి, ముఖ్యమంత్రి ప్రతిష్టకే ముప్పుగా పరిణమించే ప్రమాదం ఉంది. బయటి శత్రువుల కంటే, ఇంటి దొంగల నుంచి జాగ్రత్త పడటం అత్యంత అవసరం.

ప్రజావాణి చీదిరాల