YS Jagan: రప్పా రప్పా రౌద్రం.. ఆవేశానికా? అంతానికా జగన్?

అవును.. రాజకీయాల్లో మాటలే మారణాయుధాలు ఇది అక్షర సత్యం. కొన్ని మాటలు ప్రజల హృదయాల్లో శాశ్వతంగా నిలిచిపోతాయి, మరికొన్ని... గుండెల నిండా భయాన్ని, అసహ్యాన్ని నింపుతాయి. ‘రప్పా రప్పా’ అంటూ నేడు ఆంధ్రప్రదేశ్ రాజకీయాల్లో వినిపిస్తున్న నినాదం సరిగ్గా రెండో కోవకే చెందుతుంది.

‘నోటి దురదకు చేతి దురద తోడైతే’ అన్నట్లుగా, మాజీ ముఖ్యమంత్రి వైఎస్ జగన్ మోహన్ రెడ్డి ఉద్దేశపూర్వకంగా వాడుతున్న ఈ పదాన్ని, ఆయన అనుచరులు బహిరంగ సభల్లో రక్తదాహంతో కూడిన నినాదాలుగా మార్చేస్తున్నారు. ముఖ్యమంత్రిగా ఒక రాష్ట్రాన్ని పాలించిన వ్యక్తి, తన అనుచరులు అత్యుత్సాహంతో ‘గంగమ్మ జాతర.. రప్పా రప్పా తలకాయలు నరుకుతాం’ అని నినదిస్తుంటే, వారిని మందలించాల్సింది పోయి.. ‘నేను.. రప్పా రప్పా’ అంటే తప్పేమిటి? ప్రజలు ఆనందిస్తున్నారని వెనకేసుకొస్తున్నారు. ఈ వైఖరి చూస్తుంటే, ఆయన ఫ్యాక్షనిజం, అరాచక పోకడలకే మొగ్గు చూపుతున్నారనే విమర్శలకు మరింత బలం చేకూరుతున్నది.

రప్పా రప్పా వెనుక రాజకీయం!

వైసీపీ అధినేత, మాజీ సీఎం వైఎస్ జగన్, ‘మళ్ళీ నేను అధికారంలోకి వస్తే...’ అంటూ మాట్లాడుతున్న ప్రతి మాటా ఈ ‘రప్పా రప్పా’ నినాదానికి మరింత ఊపునిస్తున్నది. ఆయన తరచుగా చేస్తున్న ఈ వ్యాఖ్యల వెనుక, ఇదే తమ పార్టీ సంస్కృతి లేదా విధానమని కార్యకర్తలు భావిస్తున్నట్లు స్పష్టమవుతోంది. ‘రాజు తలచుకుంటే దెబ్బలకు కొదవా?’ అన్నట్టుగా, నాయకుడి మద్దతు ఉందనే ధైర్యంతో వారు మరింత రెచ్చిపోతున్నారు. అయితే, తన డైలాగులు వైరల్ అవుతున్నాయని, ప్రజలు ఆనందిస్తున్నారని జగన్ అనుకోవడం పచ్చి భ్రమ. ఫ్యాక్షనిజం, అరాచక పోకడలను ఏ సమాజమూ ప్రోత్సహించదు. ప్రజలు అలాంటి పార్టీని చూసి ఆనందించడం కాదు, భయపడి దూరమవుతారనే కనీస రాజకీయం గ్రహించకపోవడం విచారకరం. ‘కొరివితో తల గోక్కుంటే’ ఎంత నష్టమో, ఇలాంటి అరాచక భాషను ప్రోత్సహిస్తే, ప్రజాదరణ అంతే వేగంగా పడిపోతుంది.

లోకేష్ హుందాతనం..

రాజకీయాల్లో హుందాతనం ఎంతో ముఖ్యం. ‘రప్పా రప్పా’ రౌద్రాన్ని, ఫ్యాక్షనిజాన్ని ప్రోత్సహిస్తున్న మాజీ సీఎం తీరుకు పూర్తి విరుద్ధంగా, యువ మంత్రి నారా లోకేష్ ప్రవర్తన ఉంది. సోషల్ మీడియాలో తెలుగుదేశం మద్దతుదారులు, జగన్‌ను కించపరుస్తూ చేసిన ఒక వీడియోను ఆయన ఖండించారు. సీఎం చంద్రబాబు, డిప్యూటీ సీఎం పవన్ కళ్యాణ్, లోకేష్ కలిసి నడుచుకువెళుతుంటే, ప్రతిపక్ష నాయకుడి హోదా కోసం ప్లకార్డు పట్టుకుని జగన్ వేడుకుంటున్నట్లున్న ఆ వీడియోను లోకేష్ తీవ్రంగా తప్పుపట్టారు. ‘వ్యక్తిగత దాడులు ఎన్నడూ మంచివి కావు. మన రాజకీయ ప్రత్యర్థుల పట్ల మనం మర్యాదతో, గౌరవంతో వ్యవహరించాలి.. ఆంధ్రప్రదేశ్ రాష్ట్రాభివృద్ధికి దోహదపడే నిర్మాణాత్మక రాజకీయాలపైనే మన దృష్టి పెడదాం’ అని ఆయన చేసిన ట్వీట్, మాజీ ముఖ్యమంత్రికి, ఒక యువ మంత్రికి మధ్య ఉన్న వ్యక్తిత్వం, నడవడిక, ఆలోచనల వైవిధ్యాన్ని స్పష్టంగా చూపుతోంది.

చరితలు చెప్పిన సత్యమిదే..

రాజకీయాల్లో లేదా ఏ రంగంలోనైనా మాటలు, వ్యక్తిత్వం, నడవడిక, ఆలోచనలు, నిర్ణయాలు, విధానాలు అన్నీ సక్రమంగా ఉన్నవారినే సమాజం గౌరవిస్తుంది. అలాంటివారే జీవితంలో, ఎంచుకున్న రంగంలో రాణించగలరు. అధికారం అనేది శాశ్వతం కాదు, కానీ మనిషి చూపిన మర్యాద, హుందాతనం చరిత్రలో నిలిచిపోతాయి. గత చరిత్రను పరిశీలిస్తే, హిట్లర్, సద్దాం హుస్సేన్, బిన్ లాడెన్ వంటివారు అందరినీ ‘రప్పా రప్పా’ నరికేసి, భయపెట్టి, లొంగదీసుకోవాలనుకున్నారు. కానీ చివరికి వారే నాశనమైపోయారు. ‘అందరినీ భయపెట్టినవాడు, చివరికి తన భయానికి తానే బలి అవుతాడు’ అనే సత్యాన్ని ఈ నాయకులు గ్రహించలేకపోయారు. ప్రస్తుత పరిస్థితుల్లో, జగన్, వైసీపీ కార్యకర్తలు ఈ ‘రప్పా రప్పా’ డైలాగును వదలకుండా కొనసాగించడం.. ‘శత్రువుకు శత్రువు మిత్రుడు’ అన్నట్లుగా కూటమి పార్టీల పాలిట ఒక అదృష్టం అనే చెప్పాలి. ఆ అరాచక సంస్కృతిని ప్రజలు మరింత దగ్గరగా చూసి, భయపడి, కూటమికి మరింత మద్దతు ఇచ్చే అవకాశం ఉంది. ఈ అజ్ఞానం వారికి ఎంత నష్టం కలిగిస్తుందో, ఎంతవరకు నష్టం కలిగిస్తుందో అనేది కాలమే నిర్ణయిస్తుంది. హుందాతనంతో కూడిన నిర్మాణాత్మక రాజకీయాలే అంతిమంగా రాణిస్తాయని రాజకీయ విశ్లేషకులు చెబుతున్నారు.

ప్రజావాణి చీదిరాల