Pawan Kalyan: పవన్ ‘థర్డ్ ఐ’ ఆపరేషన్.. జనసేన ఎమ్మెల్యేలకు డేంజర్ బెల్స్!

ఆంధ్రప్రదేశ్ రాజకీయాల్లో జనసేనాని, డిప్యూటీ సీఎం పవన్ కళ్యాణ్ తీసుకుంటున్న అంతర్గత నిర్ణయాలు ఇప్పుడు పెను సంచలనమే సృష్టిస్తున్నాయి. ఎప్పుడూ ప్రత్యర్థులపైనే దృష్టి సారించే ఆయన, ప్రస్తుతం తన సొంత పార్టీ ఎమ్మెల్యేలపైనే ‘మూడో కన్ను’ ప్రయోగిస్తున్నట్టు విశ్వసనీయ వర్గాల సమాచారం. అవినీతి, అక్రమాలు, సెటిల్‌మెంట్లు ఇలాంటి దందాలకు పాల్పడుతున్నట్లు కొందరు ఎమ్మెల్యేలపై తీవ్ర ఆరోపణలు రావడంతో నేరుగా సేనాని రంగంలోకి దిగిపోయారు. ఎమ్మెల్యేల కోసం ఆయన క్లోజ్ మానిటరింగ్‌ను ప్రారంభించారట. సుపరిపాలన లక్ష్యంగా కూటమి ప్రభుత్వం నడుస్తుండగా, తమ పేరు చెప్పి ప్రజలను ఇబ్బంది పెడుతున్న ఏ ఒక్క శాసనసభ్యుడిని ఉపేక్షించే ప్రసక్తే లేదని పవన్ కళ్యాణ్ గీస్తున్న లక్ష్మణ రేఖ ఇప్పుడు జనసేన వర్గాల్లో హాట్ టాపిక్‌గా మారింది. సాధారణంగా పార్టీ అధినేతలకు చేరే నివేదికల్లో పరస్పర మొహమాటాలు, గ్రూపు రాజకీయాల కారణంగా నిఖార్సయిన సమాచారం లోపించే అవకాశం ఉంటుంది. సరిగ్గా ఈ విషయాన్నే పవన్ గుర్తించారు. అందుకే, పార్టీ వర్గాల మాటలపై మాత్రమే ఆధారపడకుండా ప్రత్యేకంగా గ్రౌండ్ టీమ్‌లను రంగంలోకి దించినట్టు తెలుస్తోంది.

20 మందిపై డేంజర్ సిగ్నల్

ఈ స్పెషల్ టీమ్‌లు క్షేత్రస్థాయిలో ప్రజల అభిప్రాయాలు, కార్యకర్తల ఫీడ్‌బ్యాక్, స్థానిక సమస్యలు, ముఖ్యంగా ఎమ్మెల్యేలు, వారి అనుచరుల అక్రమాలకు సంబంధించిన ఆడియో, వీడియో ఆధారాలను కూడా సేకరిస్తున్నాయట. అంటే, ఇకపై కేవలం కాగితాల మీద నివేదికలు కాదు.. నేరుగా సాక్ష్యాలతో కూడిన రిపోర్టులు ఉప ముఖ్యమంత్రి టేబుల్‌పై చేరుతున్నాయి. ఈ ఆధారాల వెలుగులోనే ఆయన ఎమ్మెల్యేల భవిష్యత్తుపై ఒక క్లారిటీకి వస్తున్నారు. పవన్ తన పార్టీకి చెందిన దాదాపు 20 మంది ఎమ్మెల్యేలు, ఇద్దరు ఎంపీలపై కంటిన్యూస్‌గా నిఘా ఉంచుతున్నట్టు సమాచారం. అవినీతి, అక్రమాలతో పార్టీకి, ప్రభుత్వానికి చెడ్డ పేరు తెస్తున్నవారికి ఇప్పటికే తీవ్ర స్థాయి హెచ్చరికలు పంపినట్టు జనసేన వర్గాలు గుసగుసలాడుకుంటున్నాయి. ఈ జాబితాలో ముందు వరుసలో ఉన్న ఉత్తరాంధ్రకు చెందిన ఓ ఎమ్మెల్యే వ్యవహారశైలిపై పవన్ స్వయంగా ఓపెన్‌గా మాట్లాడడం రాజకీయంగా పెద్ద చర్చ అయింది. ఇక రాష్ట్రవ్యాప్తంగా ఇసుక, గ్రావెల్ దందాలు, ప్రైవేట్ సెటిల్‌మెంట్లు, ప్రభుత్వ పనుల్లో అనవసర జోక్యం వంటి కారణాలతో మరి కొందరిని ఆయన హెచ్చరించారట.

సుపరిపాలన దిశగా తొలి అడుగు

మచ్చుకు, తూర్పు గోదావరి జిల్లాకు చెందిన మరో ఎమ్మెల్యే గెలిచినప్పటి నుంచీ మంచికన్నా చెడు విషయంలోనే పాపులర్ అవుతున్నారనే ఫిర్యాదులు కుప్పలు తెప్పలుగా అందడంతో అతనికి గట్టి వార్నింగ్ ఇచ్చినట్టు తెలుస్తోంది. దీంతో ఆ ఎమ్మెల్యే వెంటనే దిద్దుబాటు చర్యలకు దిగి, ‘నా పేరు చెప్పి రేషన్ బియ్యం అమ్మితే కఠిన చర్యలు తప్పవు’ అంటూ బహిరంగ ప్రకటన చేయాల్సి రావడం.. పవన్ అంతర్గత నిఘా ఫలితానికి నిదర్శనమని చెప్పుకోవచ్చు. పవన్ ఈ వ్యవహారశైలి చూస్తున్న జనసేన నేతలు, ‘జనసేనలో డిసిప్లిన్‌పై పవన్ ఫోకస్ అంటే ఇది.. కేవలం వార్నింగ్స్‌తో సరిపెట్టకుండా, అవసరమైతే చర్యలు తీసుకోవడానికి సిద్ధంగా ఉన్నామని క్లారిటీ ఇవ్వడం ద్వారా.. సుపరిపాలన దిశగా మొదటి అడుగు బలంగా వేశారు’ అని మాట్లాడుకుంటున్నారు. ప్రభుత్వంలో కీలక బాధ్యతలు చేపట్టిన పవన్, ‘క్లీన్ పాలిటిక్స్‘కు పెద్దపీట వేయాలనే తన చిరకాల లక్ష్యాన్ని సొంత పార్టీ నుంచే ప్రారంభిస్తున్నట్టు ఈ చర్యలు స్పష్టం చేస్తున్నాయి. ఆయన గీసిన బోర్డర్‌ లైన్‌ను క్రాస్ చేసే ఎమ్మెల్యే ఎంతటి వారైనా పర్యవసానాలను ఎదుర్కోవాల్సి ఉంటుందని జనసైనికులకు తేలిపోయింది. ఇది జనసేనకు, కూటమి ప్రభుత్వానికి మంచి సందేశమని రాజకీయ విశ్లేషకులు చెబుతున్నారు.

ప్రజావాణి చీదిరాల