Nara Lokesh: ఏఐ వీడియోపై స్పందన.. నాయకుడంటే ఇలా ఉండాలి..

ఏపీలో రాజకీయాలు (AP Politics) హూందాగా నడుస్తున్నాయా? అవుననే చెప్పాలి. ముఖ్యంగా మంత్రి నారా లోకేష్ (Nara Lokesh) వ్యక్తిత్వంలో చాలా మార్పు వచ్చింది. రాజకీయాల్లో విమర్శలు.. ప్రతివిమర్శలు ఎప్పుడైనా సర్వసాధాణమే కానీ.. వ్యక్తిగత విమర్శల జోలికి వెళ్లకూడదు. తెలంగాణ-ఏపీ విభజన తర్వాత టీడీపీ ప్రభుత్వం (TDP Government) అధికారంలోకి వచ్చింది. ఆ సమయంలో కొందరు టీడీపీ నేతలు (TDP Leaders) వ్యక్తిగత విమర్శలకు పాల్పడ్డారు. వైసీపీ నేతల (YSRCP Leaders)ను అవమానించేలా మాట్లాడారు. ఆ తరుణంలోనే వైసీపీ అధినేత వైఎస్ జగన్మోహన్ రెడ్డి (YS Jaganmohan Reddy) అసెంబ్లీ నుంచి వాకౌట్ చేశారు. ఆ తరువాత పాదయాత్ర చేపట్టి పార్టీని అధికారంలోకి తీసుకొచ్చాక కానీ తిరిగి జగన్ అసెంబ్లీ (AP Assembly)లో అడుగు పెట్టలేదు.

ఇంట్లోని వారిని సైతం..

సీన్ కట్ చేస్తే వైసీపీ (YSRCP) అధికారంలోకి వచ్చాక వ్యక్తిగత విమర్శలకు మరింత పదును పెట్టింది. ఆ పార్టీ నేతలు (YCP Leaders) కేవలం అప్పటి విపక్ష నేతలనే కాకుండా వారి ఇంట్లోని వారిని సైతం.. చివరకు ఆడవారిని కూడా అసభ్యంగా మాట్లాడారు. దారణమైన అవమానాలను అప్పుడు ప్రతిపక్షంలో ఉన్న టీడీపీ నేతలు ఎదుర్కోవాల్సి వచ్చింది. తిరిగి 2019 ఎన్నికల్లో కూటమి ప్రభుత్వం అధికారంలోకి వచ్చింది. కానీ వ్యకిగత విమర్శల జోలికి అయితే వెళ్లడం లేదు. ఒకరిద్దరు వ్యక్తిగత విమర్శలు చేసినా కూడా వెంటనే సైలెంట్ అయిపోతున్నారు. కంటిన్యూ చేయడం లేదు. మొత్తానికి అధిష్టానం అయితే అలర్ట్ అయిపోయి వెంటనే నేతలకు హితబోధ చేస్తున్నట్టుగా ఉంది.

దయచేసి ప్రతిపక్ష హోదా ఇవ్వండి..

ఇదిలా ఉండగా... ఈసారి వైసీపీకి ప్రతిపక్ష హోదా కూడా దక్కలేదు. ప్రతిపక్ష హోదా ఇస్తే తప్ప తాను.. తనతో పాటు తమ పార్టీ ఎమ్మెల్యేలెవరూ అసెంబ్లీలో అడుగు పెట్టరని వైసీపీ అధినేత వైఎస్ జగన్మోహన్ రెడ్డి విమర్శలు గుప్పించారు. దీనిపై వైసీపీ నేతల నుంచి వ్యతిరేకత వస్తున్నా కూడా అధినేత మాత్రం పట్టించుకోవడం లేదు. పదే పదే ప్రతిపక్ష హోదా కోసం జగన్ డిమాండ్ చేస్తూనే ఉన్నారు. అయితే ఇటీవలి కాలంలో ఏఐలో రకరకాల వీడియోలు క్రియేట్ చేసి వదులుతున్నారు. ఈ క్రమంలోనే ‘‘రోడ్డు వెంట సీఎం చంద్రబాబు, డిప్యూటీ సీఎం పవన్ కల్యాణ్, మంత్రి నారా లోకేష్ నడుచుకుంటూ వెళుతుంటే.. రోడ్డు పక్కన జగన్.. "దయచేసి ప్రతిపక్ష హోదా ఇవ్వండి" అనే ప్లకార్డు పట్టుకుని కూర్చొని ఉంటాడు. ఆ ముగ్గరు తన వద్దకు రాగానే వారి వెంట ప్లకార్డు చూపిస్తూ వారి వెంట నడుస్తుంటారు’’ అన్నట్టుగా ఏఐలో ఓ వీడియో క్రియేట్ చేసి సోషల్ మీడియాలో వదిలారు.

మర్యాదను కాపాడుదాం..

ఈ వీడియో కాస్త నారా లోకేష్ కంట పడటంతో దానిపై ఆయన ఎక్స్ వేదికగా స్పందించారు. ఇలాంటి కంటెంట్ వెనుక ఉన్న భావోద్వేగం తనకూ ఉందన్నారు. అయినా కూడా వ్యక్తిగత దాడులు ఎప్పుడూ తగవని లోకేష్ హితవు పలికారు. మనం వారికి రాజకీయ ప్రత్యర్థులం అయితే కావొచ్చు కానీ.. వారిని కించపరిచేలా ప్రవర్తించవద్దన్నారు. ఇలాంటి కంటెంట్‌ను మరింత వైరల్ అవకుండా చూడాలని ప్రతి ఒక్కరినీ అభ్యర్థిస్తున్నానని నారా లోకేష్ తెలిపారు. అసమ్మతిలో కూడా వైసీపీ నేతల మర్యాదను కాపాడుదామని.. ఏపీని బలోపేతం చేసే నిర్మాణాత్మక రాజకీయాలపై దృష్టిపెడదామని.. టీడీపీ కేడర్‌కు నారా లోకేష్ తెలిపారు. కొద్ది రోజుల క్రితం కూడా నారా లోకేష్ రాజకీయాలను ఎన్నికలకే పరిమితం చేద్దామని.. ఏపీ అభివృద్ధి కోసం సమిష్టిగా పని చేద్దామని పిలుపునివ్వడం ఆసక్తికరంగా మారింది. నాయకుడంటే ఇలా ఉండాలి అన్నట్టుగా నారా లోకేష్ వ్యవహార శైలి ఉందని రాజకీయ విశ్లేషకులు అంటున్నారు.

ప్రజావాణి చీదిరాల