Vijayasai Reddy: గమ్యాన్ని వెదుక్కునే పనిలో విజయసాయిరెడ్డి.. ఏ దిక్కుకెళతారు?

ఏపీ (AP)లో ఇప్పడు హాట్ టాపిక్ ఎవరైనా ఉన్నారా? అంటే విజయసాయిరెడ్డి (Vijayasai Reddy). ఆయన సైలెంట్‌గా ఉంటే ఎవరూ పట్టించుకునేవారు కాదేమో.. కానీ ఆయన మాటలు పొలిటికల్ రీఎంట్రీకేనంటూ టాక్ నడుస్తోంది. వైసీపీ (YCP)లో అన్నీ తానై వ్యవహరించిన విజయసాయిరెడ్డి తదుపరి పరిణామాల కారణంగా క్రమక్రమంగా ఆ పార్టీకి దూరమవుతూ వచ్చారు. ఎన్నికల అనంతరం మొత్తానికే పార్టీకి రాజీనామా చేశారు. వైసీపీకి రాజీనామా చేసిన మీదట ఆయన బీజేపీ (BJP)లో చేరతారని అంతా భావించారు కానీ ఆయన ఆ ఆలోచనే చేయలేదు. ఆ తరువాత టీడీపీ (TDP) అనుకున్నారు అది కూడా జరగలేదు. ఇప్పుడు జనసేన (Janasena) అని కూడా టాక్ నడుస్తోంది కానీ చేరుతారా? లేదా? అనేది ప్రశ్నార్థకం. దీనికి కారణం లేకపోలేదు.. వైసీపీలో రెండవ స్థానంలో ఆయన ఉండేవారు. ఆ స్థానం పడిపోయిన మీదటే విజయసాయిరెడ్డి పార్టీకి దూరమవుతూ వచ్చారు. ఇప్పుడు జనసేనలో చేరినా కూడా ఆయనకు రెండవ స్థానం దక్కే అవకాశం లేదు.

అలా వ్యవహరించగలరా?

జనసేన అధినేత పవన్‌కల్యాణ్‌ (Pawan Kalyan)కు వెన్నుదన్నులా నాదెండ్ల మనోహర్ (Nadendla Manohar) ఉన్నారు. పవన్ ఏనాడూ నాదెండ్లను దూరం పెట్టింది లేదు. ఆయనకు ఇప్పటికీ.. ఎప్పటికీ సముచిత స్థానమే ఇస్తారనడంలో సందేహం లేదు. మరి అలాంటప్పుడు జనసేనలో విజయసాయిరెడ్డి చేరి అందరితో పాటే తాను అన్నట్టుగా వ్యవహరించగలరా? అనేది ప్రశ్నార్థకం. ఇదిలా ఉండగా.. ఏపీకి పెట్టుబడులు భారీగా వచ్చిన నేపథ్యంలోనూ ఆయన సీఎం చంద్రబాబు (CM Chandrababu)ను పరోక్షంగా ప్రశంసించారు. ఆ తరుణంలో విజయసాయిరెడ్డి ఏమైనా టీడీపీ వైపు చూస్తున్నారేమో అన్న సందేహం అయితే ఏపీ ప్రజానీకానికి వచ్చింది. కానీ టీడీపీలో కీలక నేతలు (TDP Main Leaders) చాలా మంది ఉన్నారు. పార్టీని ఆది నుంచి అంటిపెట్టుకుని ఉన్నవారున్నారు. వారందరినీ కాదని.. చంద్రబాబు అయితే విజయసాయిరెడ్డికి కీలక స్థానం ఇవ్వరనడంలో సందేహమే లేదు.

ఆ ఆలోచన ఏమైనా ఉందా?

అయితే తాజాగా ఉత్తరాంధ్ర వచ్చిన విజయసాయిరెడ్డి వైసీపీపై విమర్శలు గుప్పించారు. అధినేత జగన్‌ (YS Jaganmohan Reddy)ను అయితే నేరుగా మాట అనలేదు కానీ కోటరీని మాత్రం ఆయన టార్గెట్ చేశారు. జగన్ సైతం కోటరీ మాయలో ఉన్నారంటూ సెటైర్ వేశారు. జగన్ మంచివారే కానీ కోటరీ మాటలు విని పార్టీకి నష్టం తెచ్చుకున్నారని అంటున్నారు. మొత్తానికి విజయసాయి మాటలను బట్టి అర్ధం అవుతున్నది ఏంటంటే.. కోటరీ మాటలు విని తనను జగన్ దూరం చేసుకున్నారని పరోక్షంగా ఆయనకే చెబుతున్నారేమోననే అనుమానాలు తలెత్తుతున్నాయి. అంటే ఏ పార్టీలోకి వెళ్లినా కూడా వైసీపీలో దక్కిన స్థానమైతే దక్కదు కాబట్టి తిరిగి తనకు సముచిత స్థానం ఇస్తే సొంతగూటికే చేరే ఆలోచన ఏమైనా చేస్తున్నారా? అనేది చర్చనీయాంశంగా మారింది. ఏదో కొంతకాలమైతే రాజకీయాలకు దూరంగా ఉన్నారు కానీ అది ఎక్కువ కాలం కొనసాగించే అవకాశం లేదని ఆయన మాటలను బట్టి తెలుస్తోంది. ఎన్నికలకు రెండేళ్ల ముందుగానే ఆయన ఏదో ఒక పార్టీలో చేరడమైతే ఖాయంగానే కనిపిస్తోంది. కొంత సమయం ఉంది కాబట్టి ఈలోపు విజయసాయిరెడ్డి ఏదో ఒకటి డిసైడ్ అయ్యే అవకాశం ఉంది.

అది సాధ్యమయ్యేదేనా?

అయితే అన్ని ఊహాగానాల నడుమ మరొకటి కూడా నడుస్తోది. అదేంటంటే.. విజయసాయిరెడ్డి కొత్త పార్టీ పెడతారంటూ.. అది సాధ్యమయ్యేదేనా? ఒకవేళ పెట్టినా కూడా మనగలరా? అనేది మిలియన్ డాలర్ ప్రశ్న. ఎందుకంటే.. ఏదైనా పార్టీలో కీరోల్ అయితే పోషించగలరేమో కానీ తనే పార్టీ పెట్టి నిలబెట్టుకోగలిగే సత్తా అయితే విజయసాయిరెడ్డి లేదనడంలో సందేహమే లేదు. ఎన్నో పార్టీలను అలవోకగా గెలిపించి.. అధికారంలోకి తేగలిగిన రాజకీయ వ్యూహకర్త ప్రశాంత్ కిషోరే (Prashanth Kishore).. బీహార్‌లో పార్టీ పెట్టి దారుణమైన దెబ్బతిన్నారు. అసలే ఏపీలో కూటమి ప్రభుత్వం చాలా స్ట్రాంగ్‌గా ఉంది. దాన్ని కూలదోయడమనేది వైసీపీ (YSRCP)కే ఇప్పట్లో సాధ్యమయ్యే పరిస్థితులేం కనిపించడం లేదు. కొత్త పార్టీ పెట్టి విజయసాయిరెడ్డి ఏం చేస్తారు? ఇవన్నీ ఆయనకు తెలియనివి కాదు కాబట్టి ఆయనసలు ఆ దిశగా ప్రయత్నమే చేయరనడంలో సందేహమే లేదు. మొత్తానికి విజయసాయి అయితే ఏదో ఒక గమ్యాన్ని చేరే ఆలోచనలో అయితే ఉన్నారని తెలుస్తోంది. ఏ దిక్కుకు వెళతారనేదే తెలియాల్సి ఉంది.

ప్రజావాణి చీదిరాల