YS Sharmila: హ్యాండ్’ ఇచ్చేస్తున్న షర్మిల.. జగనన్న బాణం తిరిగి ‘వైసీపీ’లోకి..!

జగనన్న వదిలిన బాణం తిరిగి ‘వైసీపీ’ గూటికే చేరుతోందా? అంటే అవుననే సమాధానమే వినవస్తోంది. కలిసి ఉంటే కలదు సుఖమనే నానుడి ఇన్నాళ్లకు అన్నాచెల్లెళ్లకు అర్థమైనట్టుంది. ఆస్తుల కోసం విడిపోతే అస్తిత్వమే లేకుండా పోయే పరిస్థితులు ఎదురవడంతో కలిగిన కనువిప్పో.. మరొకటో కానీ షర్మిల తిరిగి వైసీపీలోకి రీ ఎంట్రీ ఇస్తారనే టాక్ గట్టిగానే నడుస్తోంది.

‘తల్లి ప్రాణం.. తమ్ముడు పొట్ట.. అన్న గెలుపు.. ఇదే నా సంకల్పం’ అంటూ ఒకప్పుడు వైసీపీ కోసం పాదయాత్ర చేసిన వైఎస్ షర్మిల, ఇప్పుడు మళ్లీ అదే గూటికి చేరబోతున్నారా? ‘అమ్మ పెట్టదు.. అడుక్కు తిననివ్వదు’ అన్న చందంగా ఏపీ కాంగ్రెస్ అధ్యక్షురాలిగా ఉన్న షర్మిల పరిస్థితి తయారైందా? అంటే అవుననే అంటున్నాయి రాజకీయ విశ్లేషణలు.

చెవిటోడి ముందు శంఖం ఊదినట్టుగా..

కొంతకాలంగా తెలంగాణ సీఎం రేవంత్ రెడ్డి తీరుపై షర్మిల గుర్రుగా ఉన్నట్లు సమాచారం. రేవంత్ రెడ్డి ఏపీ సీఎం చంద్రబాబుకు ‘బీ-టీమ్’లా పనిచేస్తున్నారని, ఆయన చంద్రబాబును పదే పదే పొగడ్తలతో ముంచెత్తుతున్నారని ఆమె ఇప్పటికే ఏఐసీసీకి ఫిర్యాదు చేశారు. అయితే, ‘చెవిటి వాడి ముందు శంఖం ఊదినట్లు’ కాంగ్రెస్ అధిష్ఠానం నుంచి ఎలాంటి స్పందన లేదు. విలువ లేని చోట ఎందుకు ఉండాలనే భావన షర్మిలలో బలపడుతోందని, మరో 15-20 రోజుల్లో ఆమె కాంగ్రెస్‌కు రాజీనామా చేసినా ఆశ్చర్యపోనక్కర్లేదని గుసగుసలు వినిపిస్తున్నాయి. మరోవైపు కాంగ్రెస్ అగ్రనేత ప్రియాంక గాంధీ ఏపీలోని కాపు నేతలతో టచ్‌లోకి వెళ్లడం చూస్తుంటే, షర్మిలను పక్కన పెట్టేందుకు హస్తం పార్టీ స్కెచ్ వేసినట్లు కనిపిస్తోంది.

రాజకీయం అంటేనే..!

‘దెబ్బ తగిలిన చోటే రత్నం దొరుకుతుంది’ అన్నట్లు, గత ఎన్నికల ఘోర పరాభవం తర్వాత వైసీపీ అధినేత, మాజీ సీఎం వైఎస్ జగన్ మోహన్ రెడ్డి రియలైజ్ అయినట్లు కనిపిస్తోంది. తల్లి విజయమ్మను, సోదరి షర్మిలను దూరం చేసుకోవడం వల్లే పార్టీ ఇమేజ్ డ్యామేజ్ అయ్యిందని, ప్రజల్లో కుటుంబ ద్రోహి అనే ముద్ర పడిందని జగన్ గ్రహించారు. ఇటు షర్మిల కూడా కాంగ్రెస్‌లో ఉండి సాధించేది ఏమీ లేదని, అన్నతో కలిసుంటేనే రాజకీయ భవిష్యత్తు ఉంటుందని భావిస్తున్నారట. ఆ మధ్య జగన్ పుట్టినరోజున షర్మిల విష్ చేయడం, దానికి జగన్ ఎంతో ప్రేమగా ‘థ్యాంక్యూ అమ్మా’ అని రిప్లై ఇవ్వడం పాము-ముంగిసలు కూడా పాలు తాగినట్లు పార్టీ శ్రేణులకు కనువిందు చేసింది. ఆస్తుల గొడవలు, కోర్టు కేసులు, ఒకరిపై ఒకరు విమర్శలు.. ఇవన్నీ చూసిన వైఎస్సార్ అభిమానులు ‘ఇంటి గుట్టు లంకకు చేటు’ అని వాపోయారు. అందుకే రాజశేఖర్ రెడ్డికి అత్యంత సన్నిహితులైన కొందరు సీనియర్లు ఇప్పుడు రంగంలోకి దిగారు. పట్టిన పట్టు విడవరాదు.. పడితే మానరాదు అనే మొండితనాన్ని వీడి, కలిసి ఉంటేనే మనుగడ సాధ్యమని అన్నా-చెల్లెళ్లకు నూరిపోశారు. వైఎస్ కుటుంబంలోని పెద్దలు కూడా ఈ పంచాయతీని కొలిక్కి తెచ్చినట్లు సమాచారం. అందుకే ఈ మధ్య షర్మిల అన్నపై విమర్శలు తగ్గించి, కూటమి ప్రభుత్వంపై విరుచుకుపడుతున్నారు.

వైసీపీలో హర్షాతిరేకాలు..

వైసీపీ శ్రేణులు మాత్రం ఆలస్యమైనా అమృతమే దొరుకుతుందని ఆనంద పడుతున్నారు. షర్మిల తిరిగి పార్టీలోకి వస్తే, క్యాడర్‌లో కొత్త ఉత్సాహం వస్తుందని భావిస్తున్నారు. అన్న కోసం బాణం, మళ్ళీ సంధించడానికి సిద్ధమవుతుందా? లేక ఈ వార్తలు కేవలం నీటి మీద రాతలేనా? అనేది తేలాల్సి ఉంది. ఏది ఏమైనా, ఏపీ రాజకీయాల్లో ముందుంది ముసళ్ళ పండుగ అన్న చందంగా, అన్నా-చెల్లెళ్ల కలయిక ఒక పెద్ద సెన్సేషన్ కాబోతోంది. కాంగ్రెస్‌లో షర్మిలను తప్పించి కాపు నేతకు పగ్గాలు అప్పగిస్తారన్న వార్తల నేపథ్యంలో, షర్మిల ముందుగానే మేల్కొని ‘కంచె లేని చేనుకు కావలి ఎందుకు?’ అని భావించి జగన్ గూటికే చేరడం ఖాయంగా కనిపిస్తోంది. ఇదేగానీ జరిగితే కూటమి పార్టీలకు ఇక చుక్కలే అని వైసీపీ శ్రేణులు ఆనందంలో మునిగితేలుతున్నాయి. మరోవైపు బాబోయ్ ‘అక్క మనకు అవసరమా..?’ అనే వైసీపీ వీరాభిమానులూ లేకపోలేదు. మొత్తానికి చూస్తే.. త్వరలోనే ఈ అన్నా-చెల్లెళ్ల ఆలింగన దృశ్యాలు అధికారికంగా వెలువడే అవకాశం ఉంది. వేచి చూద్దాం.. మరి ఈ ‘వైఎస్ బ్రాండ్’ కలయిక ఏపీ రాజకీయాలను ఎన్ని మలుపులు తిప్పుతుందో!

ప్రజావాణి చీదిరాల