Kalvakuntla Kavitha: కవితతో పెట్టుకుంటే ఖేల్ ఖతమే.. పుచ్చలు లేచిపోతాయ్..!

తెలంగాణ (Telangana), ఏపీ (AP) రాష్ట్రాలు వేరయ్యాయేమో కానీ జాతకాలు మాత్రం మారలే.. అక్కడ వైఎస్ షర్మిలారెడ్డి (YS Sharmila Reddy).. ఇక్కడ కల్వకుంట్ల కవిత (Kalvakuntla Kavitha). ఇద్దరూ ఇంటి నుంచి గెంటివేయబడినవారే. మొదట్లో కూల్ అండ్ కంపోజ్డ్‌గా ఉన్నా ఇప్పుడు మాత్రం ఎవరైనా తమ జోలికి వస్తే వారి ఖేల్ ఖతమేనంటున్నారు. షర్మిల గురించి అందరికీ తెలిసిందే కానీ కవితలోనే రోజుకో కొత్త యాంగిల్ చూస్తున్నాం. బీఆర్ఎస్ నేతల (BRS Leaders) జోలికే ఆ పార్టీని వీడిన తొలినాళ్లలో వెళ్లని కవిత.. ఇప్పుడు మాత్రం ఇచ్చిపడేస్తున్నారు. తన జోలికి వస్తే మాత్రం ఎవ్వరినీ వదలడం లేదు.. పుచ్చలు లేచిపోతాయంటూ మాస్ వార్నింగ్ ఇస్తున్నారు.

కవిత.. పుచ్చు, సచ్చు వంకాయట..

మొదట్లో అంటే కవితను బీఆర్ఎస్ (BRS) నుంచి తొలగించాక ఆమె జోలికి ఆ పార్టీ నేతలెవరూ వెళ్లలేదు. అలాగే కవిత (Kavitha) కూడా ఆ పార్టీ నేతల ఊసే ఎత్తలేదు. కానీ ఇప్పుడిప్పుడే వార్ రాజుకుంటోంది. కవిత ఇటీవలే బీఆర్ఎస్ నేతల గురించి మాట్లాడుతున్నారు తాజాగా మాజీ మంత్రి నిరంజన్‌రెడ్డి సైతం ఆమెపై మాటల బాణాలను ఎక్కుపెట్టారు. కవిత ఒక పుచ్చు, సచ్చు వంకాయ అంటూ విమర్శలు గుప్పించారు. అది తెలుసుకున్న కవిత.. ఇంకోసారి తన గురించి ఎక్కువ తక్కువ మాట్లాడినా. పిచ్చిపిచ్చిగా మాట్లాడినా పుచ్చె లేచిపోద్దంటూ మాస్ వార్నింగ్ ఇచ్చారు. తాను సిన్సియర్‌గా ప్రజల గురించి మాట్లాడానని.. దానికెందుకు భయమని నిరంజన్ రెడ్డి (Niranjan Reddy)ని ఆమె ప్రశ్నించారు.

కవిత ఏమేం విమర్శలు చేశారంటే..

అంతటితో కవిత ఆగితే బాగానే ఉండేది.. నిరంజన్‌రెడ్డి అక్రమాల చిట్టా మొత్తం బయటపెట్టారు. దానిలో నిజమెంతుందనేది తెలియదు కానీ నిన్న మొన్నటి వరకూ బీఆర్ఎస్ నాయకురాలే కాబట్టి ఆమె చేసిన వ్యాఖ్యల్లో నిజం ఉందని జనం చర్చించుకుంటున్నారు. ఇంతకీ కవిత ఏమేం విమర్శలు చేశారంటే.. ఆయనకు గత ప్రభుత్వం వ్యవసాయ శాఖామంత్రిగా అవకాశం ఇస్తే పని చేయాల్సింది పోయి ప్రజల రక్తం తాగారంటూ కవిత విమర్శలు గుప్పించారు. మంత్రి అయిన మీదట ఆయన మూడు ఫామ్‌హౌస్‌లు కట్టారని.. ఒక్కసారి మంత్రి అయితేనే అన్ని ఫామ్‌హౌస్‌లు కట్టడం ఎలా సాధ్యమైందని ప్రశ్నించారు. అంతేకాదు.. అసైన్డ్ భూములను ఆక్రమించడమే కాకుండా.. కృష్ణా నది కాలువ సైతం తన ఫామ్‌హౌస్‌ నుంచే వెళ్లేలా మళ్లించుకున్నారని ఆరోపించారు.

నిరంజన్‌రెడ్డి భూ, ధన దాహానికి అంతు లేదు..

ఆఖరికి దేవుడి మాన్యాలను సైతం నిరంజన్‌రెడ్డి వదల్లేదని కవిత ఏకిపారేశారు. అవి మాత్రమే కాకుండా వనపర్తి మార్కెట్, గద్వాల భూములు అన్నీ ఆయనకే కావాలంటూ ఏకిపారేశారు. నిరంజన్‌రెడ్డి భూ, ధన దాహానికి అంతు లేదని.. ఆయన వ్యవహారాలు కేసీఆర్‌కు తెలియవని తాను అనుకుంటున్నానని.. తెలిస్తే ఉపేక్షించరని అన్నారు. ఇటువంటి నాయకుడిని ఏ పార్టీ కూడా ఉపేక్షించకూడదని .. ఇలా కరప్షన్‌ను ఎంకరేజ్ చేసుకుంటూ పోతే తెలంగాణ బాగుపడదని కవిత అన్నారు. స్వర్గంలో ఉన్న ఆయన మామ కూడా నిరంజన్‌రెడ్డిని చూసి సిగ్గుపడుతుంటారని కవిత విమర్శించారు. ఇంత మాట్లాడిన కవిత.. నిరంజన్ రెడ్డి తన తండ్రి వయసులో ఉన్నారు కాబట్టి చాలా మర్యాదిచ్చి మాట్లాడానని తెలిపారు. ఇకనైనా పద్ధతి మార్చుకోవాలని కవిత హితవు పలికారు.

మొత్తానికి కవిత అయితే తనను బీఆర్ఎస్ నేతలు విమర్శిస్తే గట్టిగానే క్లాస్ తీసుకుంటున్నారు. అక్రమాల చిట్టా విప్పుతున్నారు. మరి నిరంజన్‌రెడ్డిపై కవిత సంధించిన విమర్శనాస్త్రాలు గురించి తెలిశాక కూడా ఎవరైనా ఆమెను విమర్శించేందుకు సాహసిస్తారా? లేదంటే కవిత గత ప్రభుత్వంలో ఏమేం చేశారనే చిట్టా విప్పుతారా? చూడాలి.. మున్ముందు ఏమేం జరుగనుందో..

ప్రజావాణి చీదిరాల