Kalvakuntla Kavitha: చీర రంగుల్లో ఫ్యామిలీ పాలిటిక్స్.. కవిత కాంగ్రెస్ సిస్టర్ కానున్నారా?

తెలంగాణ రాజకీయాల్లో ప్రస్తుతం జరుగుతున్నది చూస్తుంటే, ‘కాదేదీ కవితకు అనర్హం’ కాస్తా ‘కాదేదీ రాజకీయాలకు అనర్హం’గా మారిందేమో అనిపిస్తోంది. ముఖ్యంగా, ఒక మహిళా నాయకురాలు ధరించే వస్త్రధారణ కూడా నేడు రాజకీయ విమర్శలకు, సెటైర్లకు, అసత్య ప్రచారాలకు ప్రధాన వస్తువుగా మారిపోయింది. తాజాగా మాజీ సీఎం కేసీఆర్ కుమార్తె, ఎమ్మెల్సీ కల్వకుంట్ల కవిత ఈ పోకడకు కేంద్ర బిందువుగా నిలిచారు. డిప్యూటీ సీఎం భట్టి విక్రమార్క ఫంక్షన్‌లో పాల్గొన్న కవిత, తెలుపు రంగు ప్రధానంగా ఉండి, ఆకుపచ్చ, ఎరుపు రంగుల అంచు ఉన్న చీర ధరించడం సోషల్ మీడియాలో పెద్ద దుమారం రేపింది. ఈ మూడు రంగులు కాంగ్రెస్ పార్టీని సూచిస్తున్నాయంటూ.. బీఆర్‌ఎస్, బీజేపీ శ్రేణులు ఆమెను టార్గెట్ చేస్తూ సెటైర్ల సునామీని సృష్టిస్తున్నాయి. చీరలో ఈ ‘త్రివర్ణ రహస్యం’ ఏంటో తేల్చే పనిలో పడ్డారు నెటిజన్లు, రాజకీయ విమర్శకులు.

సిస్టర్ ఆఫ్ తెలంగాణ!

సోషల్ మీడియా వేదికగా ముఖ్యంగా బీఆర్‌ఎస్ మద్దతుదారులు, కార్యకర్తలు కవితను ఆకాశానికి ఎత్తేస్తూ వ్యంగ్య విమర్శల పదును పెంచుతున్నారు. వారి సెటైర్లు చూస్తే నవ్వు ఆపుకోవడం కష్టం. కొందరు.. సోనియా గాంధీని ‘మదర్ ఆఫ్ ఇండియన్’ అని ఆకాశానికెత్తిన కాంగ్రెస్ నేతలు, తమ కొత్త అభిమాన నాయకురాలు కవితను ఇకపై ‘సిస్టర్ ఆఫ్ తెలంగాణ కాంగ్రెస్’ అని పిలవడం ఖాయం అంటూ పొగడ్తల వర్షం కురిపిస్తున్నారు. కాంగ్రెస్ అంటే ఎంతటి అభిమానం ఉంటే.. మాజీ బీఆర్‌ఎస్ నాయకురాలు మూడు రంగుల చీర కట్టుకొని, అదీ డిప్యూటీ సీఎం ఫంక్షన్‌కి ఫ్యామిలీతో కలిసి వెళ్లాలి? అంటూ వ్యంగ్యం పలికిస్తున్నారు. మరికొందరు గతంలో వైఎస్ షర్మిల కాంగ్రెస్‌లో చేరిన సందర్భాన్ని ప్రస్తావిస్తూ కవితను లక్ష్యంగా చేసుకున్నారు. ఆంధ్రాలో అన్నయ్య తరిమేస్తే షర్మిలక్క కాంగ్రెస్ గూటికి చేరితే.. తెలంగాణలో కవితక్కను వాళ్ల అన్నయ్య (కేటీఆర్) తరిమేస్తే ఆమె కూడా కాంగ్రెస్ దిక్కే చూస్తున్నారంటూ విమర్శనాస్త్రాలు సంధించారు. ‘దిక్కులేని వాళ్లకు కాంగ్రెస్సే దిక్కు’ అన్నట్లుగా పరిస్థితులు మారాయని ఘాటు సెటైర్లు పేలుతున్నాయి. ఈ చీర ద్వారా ఆమె కాంగ్రెస్‌లో చేరబోతున్నారనే విషయాన్ని చెప్పకనే చెప్పారంటూ అసత్య ప్రచారాలకు తెరలేపుతున్నారు.

దిగజారుడు రాజకీయాలకు పరాకాష్ట

కవితను లక్ష్యంగా చేసుకుని జరుగుతున్న ఈ దిగజారుడు ప్రచారాన్ని జాగృతి కార్యకర్తలు, ఆమె మద్దతుదారులు తీవ్రంగా ఖండిస్తున్నారు. కవిత చీరపై అభ్యంతరకర చర్చ లేవనెత్తుతున్నారని మండిపడుతున్నారు. తమ నేతలను పదే పదే టార్గెట్ చేస్తున్న కవితను నేరుగా ఎదుర్కొలేక.. బీఆర్‌ఎస్, బీజేపీ శ్రేణులు ఇలా చీర పేరుతో వ్యక్తిగత దూషణలకు దిగుతున్నాయని కవిత మద్దతుదారులు ఆగ్రహం వ్యక్తం చేస్తున్నారు. దిగజారుడు రాజకీయాలకు ఇది పరాకాష్ట అంటూ సోషల్ మీడియా వేదికగా నెటిజన్లపై విరుచుకుపడుతున్నారు. వారు విమర్శకులకు ఒక కీలకమైన ప్రశ్న సంధిస్తున్నారు. ఆడబిడ్డల జోలికి వచ్చేముందు మీ సంస్కారం ఏంటో ఒకసారి చూసుకోవాలని సూచిస్తున్నారు. ఒక మహిళా నాయకురాలు ధరించిన చీర రంగులపై, అది ఏ పార్టీ రంగులను పోలి ఉందనే అంశంపై ఇంతటి నీచమైన, వ్యక్తిగత దాడికి దిగడం రాజకీయ విలువలకు, సంస్కారానికి ఎంతమాత్రం సబబు కాదు. రాజకీయ విమర్శలు సిద్ధాంతాలు, విధానాలు, ప్రజా సమస్యల చుట్టూ తిరగాలి తప్ప.. ఒక ఆడపడుచు వ్యక్తిగత వస్త్రధారణ చుట్టూ కాదు. ఇలాంటి ప్రచారం, ట్రోలింగ్ ద్వారా రాజకీయ నాయకుడి ప్రతిష్టను తగ్గించాలని చూడటం, ప్రజా జీవితంలో మహిళలకు ఉండే గౌరవాన్ని మరింత దిగజార్చే చర్య అవుతుంది

ప్రజావాణి చీదిరాల