Mohammad Azharuddin: పొలిటికల్ పిచ్‌పై అజార్ 'డూ ఆర్ డై' ఇన్నింగ్స్.. ‘అక్కే’ దిక్కా?

తెలంగాణ రాజకీయాల్లో ఇప్పుడిదే హాట్ టాపిక్.. మంత్రి మహమ్మద్ అజారుద్దీన్ (Mohammad Azharuddin) పదవి! టీమిండియా మాజీ కెప్టెన్‌గా మైదానంలో ఎన్నో బంతులను బౌండరీలకు పంపిన అజార్, ఇప్పుడు పొలిటికల్ పిచ్‌పై అత్యంత క్లిష్టమైన "డూ ఆర్ డై" పరిస్థితిని ఎదుర్కొంటున్నారు. మంత్రిగా ప్రమాణ స్వీకారం చేసిన అజార్ ముంగిట ఇప్పుడు 'ఎక్స్‌పైరీ డేట్' కనిపిస్తోంది. అది దాటకముందే ఆయన ఏదో ఒక సభకు ఎన్నిక కావాలి.. లేదంటే మంత్రి కుర్చీ ఖాళీ చేయక తప్పదు అన్నదే బర్నింగ్ టాపిక్.

ఆరు నెలల నిబంధన..!

రాజ్యాంగ నిబంధనల ప్రకారం, ఏ సభలోనూ (అసెంబ్లీ లేదా కౌన్సిల్) సభ్యుడిగా లేని వ్యక్తి మంత్రిగా ప్రమాణ స్వీకారం చేస్తే, ఆరు నెలల లోపు తప్పనిసరిగా ఎమ్మెల్యేగా లేదా ఎమ్మెల్సీగా ఎన్నికవ్వాలి. అజారుద్దీన్ (Azharuddin) 2025 అక్టోబరులో మంత్రిగా బాధ్యతలు చేపట్టారు (అంచనా ప్రకారం). ఈ లెక్కన 2026 ఏప్రిల్ నాటికి ఆయన ఏదో ఒక పదవిని దక్కించుకోవాలి. కానీ, ప్రస్తుత సమీకరణాలు చూస్తుంటే అజార్‌కు ఎటు చూసినా అన్నీ అడ్డంకులే కనిపిస్తున్నాయి.

ఖాళీ లేని ఎమ్మెల్సీ స్థానాలు..?

అజార్‌ను ఎమ్మెల్సీగా పంపి మంత్రి పదవిని కాపాడాలని కాంగ్రెస్ భావిస్తున్నా, అక్కడ సాంకేతిక ఇబ్బందులు వెన్నాడుతున్నాయి. ప్రస్తుతానికి ఖాళీ అయ్యే ఎమ్మెల్సీ స్థానాలేవీ అందుబాటులో లేవు. వచ్చే ఏడాది నవంబర్ వరకు ఏ ఎమ్మెల్సీ పదవీ ముగిసే అవకాశం లేదని రాజకీయ విశ్లేషకులు చెబుతున్నారు. అజార్ గడువు ఏప్రిల్‌తో ముగుస్తుండగా, నవంబర్ వరకు వేచి చూడటం అసాధ్యం. పోనీ, ఎవరైనా రాజీనామా చేసి అజార్ కోసం సీటు త్యాగం చేస్తారా? అంటే.. ప్రస్తుత పరిస్థితుల్లో అజార్ కోసం పదవిని వదులుకునే వారు ఎవరూ కనిపించడం లేదు.

గవర్నర్ కోటాలో గండం!

గతంలో గవర్నర్ కోటాలో ఎమ్మెల్సీ పదవులను కోర్టులు లేదా సాంకేతిక కారణాలతో రద్దు చేసిన దాఖలాలు ఉన్నాయి. ఇప్పుడు కూడా గవర్నర్ కోటాలో అజార్‌ను నామినేట్ చేయాలని చూస్తే, పాత వివాదాలు లేదా చట్టపరమైన చిక్కులు ఎదురయ్యే ప్రమాదం ఉంది. ఒకవేళ ఆ నియామకం చెల్లదని తేలితే, అజార్ మంత్రి పదవి గాల్లో దీపమే అవుతుంది. మరోవైపు.. మైనారిటీ వర్గాల్లో ఒక కొత్త చర్చ మొదలైంది. జూబ్లీహిల్స్ ఉపఎన్నికలో మైనారిటీ ఓట్లను గంపగుత్తగా కొల్లగొట్టడానికే అజారుద్దీన్‌కు తాత్కాలికంగా మంత్రి పదవి కట్టబెట్టారా? అనే అనుమానాలు వ్యక్తమవుతున్నాయి. ఎన్నికలు ముగిశాక, సాంకేతిక కారణాలు చూపి ఆయనను పదవి నుంచి తప్పిస్తారనే ప్రచారం మైనారిటీ నాయకుల్లో గట్టిగా వినిపిస్తోంది. ఇది కేవలం ఎన్నికల స్టంట్ మాత్రమేనా అనే ప్రశ్నలు తలెత్తుతున్నాయి.

కాపాడితే ఆ 'అక్క' మాత్రమే కాపాడాలి!

ఇన్ని చిక్కుముడుల మధ్య అజార్‌కు ఉన్న ఒకే ఒక ఆశ.. కాంగ్రెస్ కొత్త దోస్తు, బీజేపీ, బీఆర్ఎస్ పార్టీలు మారుతూ వచ్చిన 'అక్క' విజయశాంతి అలియాస్ రాములక్క లేదా ఇతర కీలక నేతలుగా భావించవచ్చు. అధిష్టానం వద్ద గట్టిగా పట్టుబట్టి, ఎవరినైనా ఒప్పించి రాజీనామా చేయిస్తే తప్ప అజార్ గట్టెక్కలేరు. లేదంటే, ఏప్రిల్ రాగానే అజార్ 'మంత్రి' బోర్డు దిగిపోవడం ఖాయంగా కనిపిస్తోంది. మరి.. అజార్ ఈ పొలిటికల్ గూగ్లీని ఎలా ఎదుర్కొంటారు? తన పదవిని కాపాడుకోవడానికి ఏ మ్యాజిక్ చేస్తారు? అనేది వేచి చూడాలి!

ప్రజావాణి చీదిరాల