Premante Review: ప్రేమంటే ఎలా ఉందంటే..

చిత్రం: ప్రేమంటే

విడుదల తేదీ: 21-11-2025

నటీనటులు: ప్రియదర్శి, ఆనంది, సుమ, వెన్నెల కిశోర్‌, హైపర్ ఆది, జబర్దస్త్ రామ్ ప్రసాద్

దర్శకత్వం: నవనీత్‌ శ్రీరామ్‌

కెమెరా: విశ్వనాథరెడ్డి

సంగీతం: లియోన్‌ జేమ్స్‌

నిర్మాతలు: పుస్కూర్‌ రామ్మోహన్‌రావు, జాన్వీ నారంగ్‌..

ప్రియదర్శి, ఆనంది (Anandi) జంటగా నటించిన చిత్రం ‘ప్రేమంటే’ (Premante). ప్రియదర్శి (Priyadarshi) నటించిన గత చిత్రమైతే ఆశించిన ఫలితాన్నివ్వలేదు కానీ అంతకు ముందు చిత్రాలన్నీ అద్భుతమైన విజయం సాధించాయి. ఈ క్రమంలోనే ఈ చిత్రం విషయంలో ప్రియదర్శి చాలా జాగ్రత్తలు తీసుకున్నట్టుగా తెలుస్తోంది. అంతేకాకుండా సినిమా ప్రమోషన్స్ సైతం బీభత్సంగా నిర్వహించి సినిమాపై హైప్ అయితే బాగానే క్రియేట్ చేశారు. ట్రైలర్‌తో సినిమాపై అంచనాలు మరింత పెరిగాయి. మరి అప్‌డేట్స్ క్రియేట్ చేసిన అంచనాలను సినిమా అందుకుందా? తెలుసుకుందాం.

కథేటంటే..

మదన్మోహన్‌ అలియాస్‌ మది (ప్రియదర్శి)ని ఒకమ్మాయి పెళ్లికి రిజెక్ట్ చేస్తుంది. ఆ అమ్మాయి వివాహం.. రమ్య (ఆనంది) రిజెక్ట్ చేసిన అబ్బాయితో వివాహం జరుగుతూ ఉంటుంది. దీనికి వీరిద్దరూ హాజరవుతారు. అక్కడ ఇద్దరికీ పరిచయం ఏర్పడటం.. అదే సమయంలో పెళ్లిళ్ల పేరయ్య ద్వారా అదే పెళ్లిలో వీరిద్దిర తల్లిదండ్రులు కలుసుకోవడం.. ఇద్దరికీ వివాహం నిశ్చయించడం జరుగుతుంది. అలా ఇద్దరూ వివాహమై హ్యాపీగా కాలం గడిపేస్తుంటారు. చుట్టుపక్కల మహిళలతో రమ్య వాకింగ్‌కు వెళుతూ ఉంటుంది. వారి చెప్పుడు మాటలతో భర్తపై అనుమానం పెంచుకున్న రమ్య దాని నివృత్తి కోసం యత్నిస్తుంది. ఈ క్రమంలోనే తను నమ్మిందే నిజమన్న భావనలోకి వెళుతుంది. ఆ సమయంలోనే అసలు గుట్టును మది విప్పుతాడు. తానొక దొంగనని చెబుతాడు. అది విని షాకవుతుంది రమ్య. ఆ తరువాత దొంగతనాలు మానేస్తానని భర్త నుంచి మాట తీసుకుంటుంది. కానీ అవతల నుంచి తన ఇంటిపై లోన్ తీసుకుని ఉండటంతో వారి నుంచి అతనికి ఒత్తిడి మరింత పెరగడంతో చివరిసారిగా ఓ దొంగతనం చేయడానికి సిద్ధమవుతాడు. అది గ్రహించిన భార్య ఏం చేసింది? వారిద్దరి జీవితం ఎలాంటి మలుపు తీసుకుందనేదే కథ.

సినిమా ఎలా ఉందంటే..

దర్శకుడు నవనీత్ శ్రీరామ్ కథను కాస్త కొత్తగానే రాసుకున్నాడు. కానీ ప్రెజెంట్ చేయడంలోనే తడబడ్డాడు. ప్రియదర్శి పాత్ర చాలా మంచిది. కానీ తనకు అయిన అప్పుల నుంచి బయటపడేందుకు ఉద్యోగమైతే ఓ మార్గం కాదని భావిస్తాడు. అందుకే దొంగగా మారుతాడు. దొంగతనాలు చేయడంలోనూ మది ఎథిక్స్ పాటిస్తూ ఉంటాడు. ఇక రమ్య విషయానికి వస్తే.. అతి శుభ్రం.. బిర్యానీ చాలా టేస్టీగా చేస్తూ ఉంటుంది. ఇక్కడి వరకూ అంతా బాగానే ఉంది. కానీ సినిమా జానర్ ఏంటనేది మాత్రం అంతుబట్టలే. కామెడీనా? అసలు ఏమాత్రం ఆశించలేం. క్రైమా? అంత బీభత్సమైన.. భారీ క్రైమ్ ఏమీ లేదు. లవ్ యాంగిలా? అంటే కొంతమేర ఓకే అని చెప్పవచ్చు. ఇక దొంగతనాలకు వెళ్లి వారు చేసే పని చాలా అసహజంగా అనిపిస్తుంది. వెన్నెల కిషోర్, హైపర్ ఆది, జబర్దస్త్ రామ్ ప్రసాద్ వంటి కమెడియన్స్‌ను తీసుకున్నారు కానీ కామెడీ అనేది లేదు. సుమ, వెన్నెల కిశోర్‌ కథలో కీలకమైన పాత్రలు పోషించారు కానీ వీరిద్దరి కాంబినేషన్ సీన్స్ పెద్దగా ఆకట్టుకోలేదు.

ఎవరెలా నటించారంటే..

ప్రియదర్శి సినిమాకు హైలైట్ అని చెప్పాలి. అంతకు మించిన ప్రాధాన్యత రమ్య పాత్రకు ఉంది. భార్యాభర్తలిద్దరి మధ్య ప్రేమానురాగాలు చాలా బాగుంటాయి. ఇక వెన్నెల కిషోర్ తన పాత్ర పరిధి మేరకు అద్భుతంగా నటించారు. సుమ చాలా కాలం తర్వాత ఎక్కువ సేపు వెండితెరపై కనిపించింది. అయితే ఆమె పాత్ర ఎందుకు విడాకులకు మొగ్గు చూపుతుంటుంది? ఎందుకు విడాకులు తీసుకోమంటూ అందరినీ గైడ్ చేస్తుంటుందనేది దర్శకుడు చెప్పలేదు. హైపర్ ఆది, జబర్దస్త్ రామ్ ప్రసాద్ అసలెందుకు ఈ చిత్రంలో నటించారో అర్థం కాదు.

టెక్నికల్ పరంగా..

దర్శకుడు రాసుకున్న కథ కొత్తగా అయితే ఉంది. బాగానే ప్రెజెంట్ చేశారు కానీ ఎందుకో అంతలా ఆకట్టుకోలేదనే చెప్పాలి. అంతమంది కమెడియన్స్ చిత్రంలో ఉన్నప్పుడు జనాలు కామెడీని ఆశించడం సర్వసాధారణం కానీ అది వర్కవుట్ కాలేదు. దొంగతనాలకు వెళ్లి వారు చేసే పనులు చాలా ఆర్టిఫిషియల్‌గా అనిపిస్తుంటాయి.విశ్వనాథరెడ్డి విజువల్స్‌ బావున్నాయి. జేమ్స్‌ లియోన్‌ సంగీతం పర్వాలేదనిపిస్తుంది.

ఫైనల్‌గా.. ప్రేమంటే పెద్దగా ప్రేక్షకుల ప్రేమకు నోచుకోదు.

రేటింగ్‌ – 2.5/5

ప్రజావాణి చీదిరాల