Delhi Explosion: ఢిల్లీలో భారీ పేలుడు.. 10 మంది మృతి.. రిమోట్‌తో బ్లాస్టింగ్..?

దేశ రాజధాని ఢిల్లీ (Delhi)లో భారీ పేలుడు సంభవించడంతో దేశం ఒక్కసారిగా ఉలిక్కిపడింది. ఎర్రకోట (Redfort) మెట్రో స్టేషన్‌ సమీపంలో జరిగిన ఈ పేలుడుతో 10 మంది మృతి చెందగా.. 24 మంది గాయపడ్డారు. క్షతగాత్రులను చికిత్స నిమిత్తం ఆసుపత్రికి తరలించారు. అయితే వారిలో ముగ్గురి పరిస్థితి విషమంగా ఉన్నట్టు సమాచారం. ఎర్రకోట వద్ద నిలిపి ఉంచిన ఓ కారులో పేలుడు చోటుచేసుకుంది. పేలుడు ధాటికి మృతదేహాలు ఛిద్రమవగా అక్కడ పరిస్థితి అంతా భీతావహంగా మారిపోయింది. రాత్రి దాదాపు 7 గంటల సమయంలో జరిగిన ఈ పేలుడు సమాచారం అందగానే ఏడు అగ్ని మాపక వాహనాలు హుటాహుటిన అక్కడకు చేరుకుని మంటలను అదుపు చేశాయి.

అలాగే ప్రత్యేక దర్యాప్తు బృందం (Special Investigation Team)తో పాటు క్లూస్ టీమ్ (Clues Team), ఎన్ఐఏ (NIA) రంగంలోకి దిగాయి. ఘటనా స్థలంలో వెంటనే సహాయక చర్యలు అందించడం జరిగింది. ఆ ప్రాంతాన్నంతా ప్రత్యేక దర్యాప్తు బృందాలు తమ ఆధీనంలోకి తీసుకున్నాయి. పేలుడు ధాటికి పలు కార్లు, ద్విచక్ర వాహనాలు ధ్వంసమయ్యాయి. పేలుడు ఘటనపై పలు అనుమానాలు వ్యక్తమవుతున్నాయి. పేలుడు పదార్థాలను కారులో ఉంచి ఎవరైనా రిమోట్ సాయంతో బ్లాస్టింగ్‌కు పాల్పడి ఉంటారని అధికారులు భావిస్తున్నారు. ప్రతి సోమవారం ఢిల్లీలోని పర్యాటక ప్రదేశాలు, మార్కెట్లకు సెలవు. దీంతో ప్రమాదం తీవ్రత కాస్త తక్కువగా ఉందని.. వేరొక రోజుల్లో అయితే అధిక జనసంద్రం కారణంగా మరింత మంది ప్రాణాలు కోల్పోవల్సి వచ్చేదని అంటున్నారు.

పేలుడుపై కొందరు స్పందిస్తున్నారు. భారీ సౌండ్‌లో పేలుడు సంభవించిందని.. ఆ వాహనానికి సమీపంలో ఉన్న వాహనాలన్నీ ధ్వంసమైనట్టు చెబుతున్నారు. దేశ రాజధానిలో సంభవించిన పేలుడు నేపథ్యంలో ఢిల్లీ సహా దేశంలోని పలు నగరాల్లో హైఅలర్ట్‌ ప్రకటించారు. ఇవాళ (సోమవారం) ఉదయం హరియాణాలోని ఫరీదాబాద్‌లో సైతం భారీగా పేలుడు (Delhi Explosion) సామగ్రి పట్టుబడ్డాయి. ఆ వెంటనే అంటే సాయంత్రమే ఢిల్లీలోని ఎర్రకోట సమీపంలో భారీ పేలుడు ఘటన దేశాన్ని నివ్వెరబోయేలా చేస్తోంది. ఈ క్రమంలోనే ఢిల్లీ, హరియాణా, యూపీలను కలిపే అన్ని సరిహద్దు పాయింట్ల వద్ద.. అలాగే రైల్వే స్టేషన్లు, మెట్రోస్టేషన్లు వంటి సున్నితమైన ప్రాంతాల్లో భద్రతను పెంచారు. స్పెషల్‌ సెల్‌, క్రైం బ్రాంచ్‌ సహా అన్ని విభాగాలకు చెందిన అధికారులను అప్రమత్తం చేశారు.