Raju Weds Rambai Review: వారి అనుభవమంతా ఏమైనట్టు?

చిత్రం: రాజు వెడ్స్‌ రాంబాయి

విడుదల తేది: 21-11-2025

నటీనటులు: అఖిల్ ఉడ్డెమారి, తేజస్వినీ రావ్, శివాజి రాజా, చైతు జొన్నలగడ్డ, అనిత చౌదరి తదితరులు

దర్శకత్వం: సాయిలు కంపాటి

నిర్మాతలు:వేణు ఊడుగుల, రాహుల్ మోపిదేవి

సంగీతం: సురేశ్‌ బొబ్బిలి

సినిమాటోగ్రఫీ: వాజిద్‌ బేగ్‌

ప్రేమకథలకు కాలం చెల్లిపోయి చాలా కాలం అవుతోంది. ఒకవేళ వచ్చినా కూడా చాలా విభిన్నంగా.. మునుపెన్నడూ చూడనంత ఆసక్తికరంగా.. ఒకవేళ చూసినే కథే అయినా కూడా ఒక మేజిక్ జోడించాలి. కొత్త సీసాలో పోసి సరికొత్తగా అందించాలి. ఇదంతా చేయలేకో.. మరొకటో కానీ దాదాపుగా ప్రేమకథలు తగ్గిపోయాయి. కథలో ప్రేమను భాగం చేసుకుంటున్నారు కానీ ప్రేమనే కథగా తీసుకుని ప్రేక్షకుల ముందుకు రావడం లేదు. మరి ప్యూర్ ప్రేమకథగా వచ్చిన ‘రాజు వెడ్స్ రాంబాయి’ (Raju Weds Rambai Review) ప్రేక్షకులను మెప్పించిందా? చూద్దాం.

కంపాటి సాయిలు.. వేణు ఊడుగుల దగ్గర డైరెక్షన్ డిపార్ట్‌మెంటులో పని చేస్తుండేవారు. అలాంటి వ్యక్తి తన ప్రాంతంలో తన చిన్నతనంలో జరిగిన ఒక వాస్తవ కథను తెలుసుకుని దానిని సినిమాగా తీయాలనుకున్నారు. ఈ కథ విన్న వేణు ఊడుగుల, రాహుల్ మోపిదేవి ఈ చిత్రానికి నిర్మాతలుగా మారారు. క్రమక్రమంగా ఈ కథకు ఈటీవీ విన్, బన్నీ వాస్ వంటి వారంతా తోడయ్యారు.

సినిమా కథేటంటే..

ఇక సినిమా కథ గురించి ప్రత్యేకంగా చెప్పాల్సింది ఏమీ లేదు. మంచు మనోజ్ వాయిస్ ఓవర్‌తో కథ ప్రారంభమై.. ఆయన వాయిస్ ఓవర్‌తోనే కథ ముగుస్తుంది. ఒక డప్పు కొట్టుకునే రాజు (Hero Akhil).. రాంబాయి (Tejaswini)తో ప్రేమలో పడతాడు.. క్రమక్రమంగా ఆమె కూడా రాజును ఇష్టపడుతుంది. వీరిద్దరి ప్రేమ చివరకు ఎలాంటి మలుపు తీసుకుందనేదే కథ.

సినిమా ఎలా ఉందంటే..

సినిమాకు సంబంధించి సాయిలు అయితే నేచురాలిటీ ఎక్కడా దెబ్బ తినకుండా చూసుకున్నారనడంలో సందేహం లేదు. కానీ సర్వసాధారణమైన ఒక రొటీన్ ప్రేమకథ. ఎక్కడా కొత్తదనం అనిపించదు. చివరకు వాస్తవ కథలో ఏం జరిగిందో అది చూపించారు. దీని కోసం రెండున్నర గంటల సమయం. ఫస్ట్‌హాఫ్ కొంతమేర బాగానే ఉందనిపించినా కూడా సెకండాఫ్ విషయానికి వస్తే సాగదీత విసుగనిపిస్తుంది. ఎక్కడా కూడా కొత్తదనాన్ని జోడించలేదు సరికదా.. కనీసం అందించే కథలో ఎలాంటి మేజిక్‌ను యాడ్ చేయలేదు. ఈ సినిమాలో ఎంతోమంది అనుభవజ్ఞులు పాలు పంచుకున్నారు. మరి వారి అనుభవం ఏమైందో తెలియలేదు.

ఎవరెలా నటించారు?

నటీనటులంతా కూడా చక్కగానే నటించారనడంలో సందేహం లేదు. హీరోహీరోయిన్లుగా నటించిన అఖిల్, తేజస్విని వారి పాత్రల్లో చక్కగా నటించారు. శివాజీ రాజా, అనిత చౌదరి, చైతు జొన్నలగడ్డ తమ పాత్రల్లో జీవించారు. సినిమాకు సంగీతం ప్రాణమని చెప్పాలి. ఒకే ఒక్క పాట ఈ సినిమాకు ప్రాణమని చెప్పాలి. సుటెక్నికల్ వాల్యూస్ పర్వాలేదనిపించాయి.

ప్లస్, మైనస్‌లేంటి?

సురేష్ బొబ్బిలి (Suresh Bobbili) సంగీతం, నటీనటుల నటన ఈ సినిమాకు ప్లస్. ఇక మైనస్‌ల విషయానికి కథలో కొత్తదనం ఏమాత్రం లేదు. రియల్ స్టోరీ (Real story) కాబట్టి ఆశించకూడదు. కానీ దాన్ని మలిచిన విధానం కూడా ఏమాత్రం ఆకట్టుకునేలా లేదు. సెకండాఫ్‌ అంతా సాగదీత.. విసుగు తెప్పిస్తుంది.

ఫైనల్‌గా.. రాజుతో రాంబాయి పెళ్లి ఆకట్టుకోలే..

రేటింగ్: 2/5

ప్రజావాణి చీదిరాల