Anil Ambani: అన్న ఆకాశానికి.. తమ్ముడు పాతాళానికి..
ధీరూబాయ్ అంబానీ (Dheerubhai Ambani) తన వ్యాపార సామ్రాజ్యాన్ని ఇద్దరు కుమారులకు సరిసమానంగానే పంచారు. కొంతకాలం కలిసి వ్యాపారం చేసిన మీదట పొరపొచ్చాలు వచ్చాయి. దీంతో ఇద్దరూ విడిపోయారు.
చేతికి ఉన్న ఐదు వేళ్లు సమానంగా ఎలా అయితే ఉండవో.. అన్నదమ్ములు కూడా అలాగే సమానం కాదని చెబుతారు. ఒకరి ఆలోచనా విధానానికి మరొకరి ఆలోచన విధానానికి చాలా తేడా ఉంటుంది. ఏరంగమైనా కూడా ఒకరు రాణించినట్టుగా మరొకరు రాణించాలని లేదు. దీనికి సంబంధించి మనం నిత్య జీవితంలో చాలా ఉదాహరణలు చూస్తున్నాం. సినీ రంగంలో అల్లు అర్జున్ (Allu Arjun) రాణించినంతగా ఆయన సోదరుడు శిరీష్ (Allu Sirirsh) రాణించలేకపోయాడు. విజయ్ దేవరకొండ (Vijay Devarakonda) సోదరులను చూసినా కూడా మనకు అదే అనిపిస్తుంది. అలాగే వ్యాపార రంగం విషయానికి వస్తే అంబానీ సోదరులు.
ముకేశ్ అంబానీ (Mukesh Ambani) వ్యాపారంలో దిగ్గజంగా ఎదిగితే.. అనిల్ అంబానీ మాత్రం దారుణమైన స్థితికి వెళ్లారు. ధీరూబాయ్ అంబానీ (Dheerubhai Ambani) తన వ్యాపార సామ్రాజ్యాన్ని ఇద్దరు కుమారులకు సరిసమానంగానే పంచారు. కొంతకాలం కలిసి వ్యాపారం చేసిన మీదట పొరపొచ్చాలు వచ్చాయి. దీంతో ఇద్దరూ విడిపోయారు. అప్పటి నుంచి ఒకరి వ్యాపార సామ్రాజ్యం నలుమూలలకూ విస్తరిస్తే.. మరొకరి సామ్రాజ్యం ఉన్న చోటనే కుప్పకూలింది. ముకేశ్ అంబానీ వ్యాపార రంగంలో రాకెట్‌లా దూసుకెళ్లగా.. అనిల్ మాత్రం అక్కడే చతికిలపడ్డారు. అంతేకాకుండా పలు ఆర్థిక నేరాలకు సంబంధించిన ఆరోపణలు ఎదుర్కొంటూ తీవ్రమైన ప్రతికూల పరిస్థితులు ఎదుర్కొన్నారు. ప్రస్తుతం అయితే పరిస్థితి అయితే మరీ దారుణం.
చిన్న నెగిటివ్ టాక్ వచ్చినా..
అనిల్ అంబానీ (Anil Ambani)కి సంబంధించిన ఆస్తులతో పాటు ఇతర ఆస్తుల్ని సైతం ఈడీ (ED) అటాచ్ చేసింది. దీంతో అంబానీ సోదరులు మరోసారి హాట్ టాపిక్‌గా మారారు. ముంబైలోని అనిల్ నివాసంతో పాటు రెండు తెలుగు రాష్ట్రాల్లోని ఆస్తులు.. ఇతర ఆస్తులను ఈడీ అటాచ్ చేసింది. సక్సెస్ అందరికీ సొంతం కాదు. కొంత అదృష్టం.. దానితో పాటు సిన్సియారిటీ ఉండాలి. ఆర్థిక నేరాలకు సంబంధించిన ఆరోపణలనేవి రాకుండానే చూసుకోవాలి. ఒకసారి వస్తే వ్యాపార రంగంలో నమ్మకం కోల్పోతారు. అసలే చిన్న నెగిటివ్ టాక్ వచ్చినా నిజానిజాలు విషయం ఆరా తీసే ఒక్క క్షణం కూడా సమయం ఇవ్వకుండానే షేర్లు ధడేలున కుప్పకూలుతాయి. దీంతో ఆర్థిక నష్టం మాటల్లో చెప్పలేనంత ఉంటుంది.
ఇతర కంపెనీలకు రుణాలుగా..
అనిల్ అంబానీ ప్రజల నుంచి వ్యాపారం పేరిట సమీకరించిన ధనాన్ని అక్రమ పద్దతుల్లో మళ్లించిన వైనంపై కేసులు నడుస్తున్నాయి. దీనిలో భాగంగానే అనిల్ అంబానీకి చెందిన రిలయన్స్ హోమ్ ఫైనాన్స్ (RHFL).. రిలయన్స్ కమర్షియల్ ఫైనాన్స్ (RCFL) లను ఈడీ జప్తు చేసింది. 2017-19లో యస్ బ్యాంకు.. ఆర్‌హెచ్ఎఫ్ఎల్‌లో రూ2935 కోట్లు.. ఆర్‌సీఎఫ్ఎల్ లో రూ.2045 కోట్లను పెట్టుబడి పెట్టింది. అయితే 2019 నాటికి అవి నిరర్థక పెట్టుబడులుగా మారాయి. దీనికి కారణం.. ఆ రెండు కంపెనీల్లోని డబ్బును ఇతర కంపెనీలకు రుణాలుగా ఇవ్వడమే. ఒక వ్యాపారం పేరిట యస్ బ్యాంకు నుంచి డబ్బు తీసుకుని మరో వ్యాపారానికి డబ్బు కేటాయించింది.
రంగంలోకి దిగిన ఈడీ..
రెండు కంపెనీల నుంచి రూ.13,600 కోట్లను ఇతర కంపెనీలకు మళ్లించినట్టుగా ఈడీ గుర్తించింది. మొత్తంగా అయితే రూ.17వేల కోట్లకు పైనే నిధులను మళ్లించినట్టుగా ఆరోపణలు రావడంతో ఈడీ రంగంలోకి దిగింది. అన్ని క్రమంలోనే కంపెనీలతో పాటు వాటికి చెందిన వ్యక్తుల ఇళ్లలో సోదలు నిర్వహించి అనిల్ అంబానీ ఇంటితో పాటు ఇతర ఆస్తులను అటాచ్ చేసింది. ఈ క్రమంలోనే తెలుగు రాష్ట్రాలతో పాటు ముంబై, నోయిడా, ఢిల్లీ, థానే, పుణె, చెన్నై, ఘజియాబాద్ తదితర ప్రదేశాల్లోని అనిల్ అంబానీకి చెందిన రూ.7500 కోట్లకు పైనే ఆస్తులను ఈడీ అటాచ్ చేసినట్టుగా తెలుస్తోంది. మొత్తానికి అన్న ముకేశ్ ఆకాశమే హద్దుగా ఎదుగుతుంటే.. తమ్ముడు పాతాళానికి జారిపోతున్నారు.
