Venkatesh: వెంకీ బర్త్‌డే స్పెషల్.. ‘పెళ్లి చేసుకుందాం’ రీరిలీజ్..

విక్టరీ వెంకటేష్ ఫ్యామిలీ హీరోగా మారడానికి కారణమైన చిత్రాల్లో ‘పెళ్లి చేసుకుందాం’ కూడా ఒకటి. అప్పటి అందాల తార, స్టార్ హీరోయిన్ సౌందర్యతో కలిసి ఆయన నటించిన ఈ చిత్రం బ్లాక్ బస్టర్ హిట్ కొట్టింది. ముత్యాల సుబ్బయ్య దర్శకత్వంలో రూపొందిన ఈ ట్రెండ్ సెట్టింగ్ చిత్రాన్ని సి.వెంకట్రాజు - శివరాజు సంయుక్తంగా నిర్మించారు. ఈ చిత్రానికి స్పెషల్ అట్రాక్షన్ అంటే పాటలు, అలాగే పోసాని కృష్ణమురళి అందించిన సంభాషణలు. ప్రస్తుతం రీరిలీజ్‌ల ట్రెండ్ నడుస్తున్న విషయం తెలిసిందే. ఈ క్రమంలోనే ఈ చిత్రం కూడా రీరిలీజ్‌కు సిద్ధమవుతోంది. సాయిలక్ష్మి ఫిలిమ్స్ పతాకంపై వరప్రసాద్ రెండు తెలుగు రాష్ట్రాల్లో 4 కె లో భారీ స్థాయిలో విడుదల చేసేందుకు సన్నాహాలు చేస్తున్నారు.

ఈ సందర్భంగా వరప్రసాద్ మాట్లాడుతూ..."సంక్రాంతికి వస్తున్నాం" చిత్రంతో తెలుగులో 300 కోట్ల క్లబ్ ఫౌండర్ హీరోగా వెంకటేష్ చరిత్ర సృష్టించారన్నారు. అలాంటి వెంకటేష్ నటించిన ఆణిముత్యాల్లో ఒకటైన చిత్రం "పెళ్ళి చేసుకుందాం". దీనిని 4 కె రిజల్యూషన్‌లో డిసెంబర్ 13న ప్రేక్షకుల ముందుకు ఫ్రెష్‌గా తీసుకువస్తున్నట్టు ఆయన వెల్లడించారు. మన రెండు రాష్ట్రాల్లో ఉన్న విక్టరీ ఫ్యాన్స్ తోపాటు... సినీ ప్రేమికులంతా ఈ చిత్రాన్ని ఆదరిస్తారనే నమ్మకం ఉందని వరప్రసాద్ తెలిపారు. లైలా బ్రహ్మానందం, తనికెళ్ళ భరణి తదితరులు ముఖ్య పాత్రలు పోషించిన ఈ చిత్రం మరోసారి వెంకీ పుట్టినరోజు సందర్భంగా వెండితెరపై వెలుగులు విరజిమ్మనుంది.

ప్రజావాణి చీదిరాల