Patang Movie: ‘పతంగ్’ కోసం ఓ స్టేడియంను తీసుకుని అంత చేశారా?

సురేష్‌ ప్రొడక్షన్స్‌ అధినేత, ప్రముఖ నిర్మాత డి.సురేష్‌ బాబు సమర్పణలో ప్రణీత్ ప్రత్తిపాటి దర్శకత్వంలో రూపొందిన చిత్రం ‘పతంగ్’. ఇన్‌స్టాగ్రామ్ సెన్సేష‌న్ ప్రీతి ప‌గ‌డాల‌, జీ స‌రిగ‌మ‌ప ర‌న్న‌ర‌ప్ ప్ర‌ణ‌వ్ కౌశిక్‌, వంశీ పూజిత్ ప్రధాన పాత్రల్లో నటించిన ఈ చిత్రం కామెడీ స్పోర్ట్స్ డ్రామాగా తెరకెక్కింది. విజ‌య్ శేఖ‌ర్ అన్నే, సంప‌త్ మ‌క, సురేష్ కొత్తింటి, నాని బండ్రెడ్డి ఈ చిత్రానికి నిర్మాతలుగా వ్యవహరిస్తున్నారు. ఈ చిత్రంలో ఎస్‌పీ చరణ్ ఒక కీలక పాత్రలో నటించారు. ఈ సినిమా డిసెంబర్ 25న ప్రేక్షకుల ముందుకు రానుంది. ఈ క్రమంలోనే చిత్ర యూనిట్ ప్రమోషన్స్ ప్రారంభించింది. నేడు (శుక్రవారం) ఈ చిత్రం నుంచి ఒక లిరికల్ సాంగ్‌ను విడుదల చేశారు. ఈ సందర్భంగా నిర్వహించిన కార్యక్రమానికి నిర్మాత సురేష్ బాబు ముఖ్య అతిథిగా హాజరయ్యారు.

ఈ సందర్భంగా సురేష్ బాబు మాట్లాడుతూ.. ఈ సినిమాను యంగ్‌స్టర్స్ అంతా కలిసి ఎంతో డబ్బు ఖర్చు పెట్టి చేశారు. ముఖ్యంగా క్లైమాక్స్ కోసం ఎంతో ఖర్చు పెట్టారని తెలిపారు. ఓ స్టేడియంను తీసుకుని.. పతంగుల పోటి పెట్టి క్లైమాక్స్‌ను చాలా రిచ్‌గా చిత్రీకరించారన్నారు. సినిమా తప్పకుండా అందరికి నచ్చుతుందని.. అలాగే మంచి విజయం సాధిస్తుందని తెలిపారు. నిర్మాతల్లో ఒకరైన నాని బండ్రెడ్డి మాట్లాడుతూ.. తనను నమ్మి ఈ సినిమాకు సమర్పకునిగా వ్యవహరిస్తున్న సురేష్‌బాబుకు కృతజ్ఞతలు తెలిపారు. నవ్యమైన కాన్సెప్ట్‌తో చేసిన ఈ సినిమా అందరికి నచ్చుతుందనే నమ్మకం ఉందని అన్నారు.

సంగీత దర్శకుడు జోస్‌ జిమ్మి మాట్లాడుతూ.. సురేష్‌ బాబు ఈ పాటను విడుదల చేయడం ఆనందంగా ఉందన్నారు. తాను కేరళలో పుట్టానని.. భీమవరంలో పెరిగానని తెలిపారు. తన పాటలు, సినిమా అందరికీ నచ్చుతుందని ఆశాభావం వ్యక్తం చేశారు. పూజిత్‌ మాట్లాడుతూ.. ఈ సినిమాలో ప్రతి సాంగ్‌ అందరిలో హుషారు తెప్పించే విధంగా ఉంటుందని.. ఈ సినిమా పాటలు తన మ్యూజికల్‌ టేస్ట్‌ను మార్చేశాయన్నాడు. ప్రణవ్‌ కౌశిక్‌ మాట్లాడుతూ.. తమది చిన్న సినిమా అని.. అంతా సపోర్ట్ చేయాలని కోరాడు. తామంతా కొత్తవాళ్లమేనని.. కష్టపడి ఓ మంచి సినిమాను పెద్దగా తీశామన్నారు. సురేష్‌బాబు గారు యాడ్‌ అవ్వడంతో సినిమా రేంజే మారిపోయిందని.. సినిమాపై ఉన్న టెన్షన్‌ అంతా పోయిందని అన్నాడు.

ఈ సందర్భంగా నిర్మాతలు మాట్లాడుతూ.. తమ చిత్రానికి ప్రముఖ నిర్మాణ సంస్థ సురేష్‌ ప్రొడక్షన్స్‌, అభిరుచి గల నిర్మాత డి.సురేష్‌బాబు సమర్పణలో రిలీజ్‌ కానుండటం ఆనందంగా ఉందని.. థియేటర్‌లో సినిమా యూత్‌ఫెస్టివల్‌లా ఉంటుందన్నారు. కొత్త‌వాళ్ల‌తో చేసిన తమ చిత్రం కొత్తగా అనిపించడంతో పాటు క్వాలిటీగా ఉంటుందన్నారు. తమ చిత్రానికి కథే హీరో అన్నారు. సినిమా చూస్తున్నంత సేపు ఆ పంతగుల పోటీ మీలో ఉత్సుకతను రేకిస్తుందని తెలిపారు.

ప్రజావాణి చీదిరాల