Andhra King Taluka Review: రామ్‌కు హిట్ పడినట్టేనా?

హీరో రామ్ పోతినేని, భాగ్యశ్రీ బోర్సే జంటగా నటించిన చిత్రం ‘ఆంధ్రా కింగ్ తాలుకా’. ఇటీవలి కాలంలో రామ్‌కు పెద్దగా హిట్స్ లేవనే చెప్పాలి. ఈ క్రమంలోనే ఈ చిత్రం తనకు తప్పక హిట్ ఇస్తుందన్న నమ్మకంతో చేశాడు. అదే విషయాన్ని గట్టిగా చెబుతున్నాడు కూడా. ఇప్పటి వరకూ వచ్చిన అప్‌డేట్స్ కూడ సినిమాపై అంచనాలను బీభత్సంగా పెంచేశాయి. ఇది మాత్రమే కాకుండా సెన్సార్ సభ్యులు కూడా సినిమా చూసి ప్రశంసలు కురిపించారనే టాక్ నడిచింది. మరి సినిమా ఎలా ఉంది? ప్రేక్షకులను మెప్పించిందా? తెలుసుకుందాం.

కథేంటంటే..

హీరో సూర్య (ఉపేంద్ర) తన వందో సినిమాకు సంబంధించిన షూటింగ్ సన్నివేశంతో సినిమా ప్రారంభమవుతుంది. నిర్మాత వచ్చేసి ఆ సినిమా ఇక తాను చేయలేనని.. వరుస ఫ్లాపుల కారణంగా సూర్య పడిపోవడమే కాకుండా.. తను కూడా ఆర్థికంగా దెబ్బతిన్నానని చెబుతాడు. ఆ సినిమా పూర్తవ్వాలంటే రూ.3 కోట్లు కావాలి. ఓ నిర్మాతకు కాల్ చేస్తే ఇస్తాను కానీ తన కొడుకు హీరోగా నటించే చిత్రంలో తండ్రి పాత్రలో నటించమని కోరుతాడు. దీంతో స్టార్ హీరోగా ఉన్న సూర్య ఆగ్రహంతో ఫోన్ పెట్టేస్తారు. ఆ తరువాత చూసుకుంటే తన అకౌంట్‌లో రూ.3 కోట్లు పడతాయి. ఆ డబ్బు వేసింది ఎవరా అని ఆరా తీయడం మొదలు పెట్టిన సూర్యకి సాగర్ (రామ్ పోతినేని) గురించి తెలుస్తుంది. అక్కడి నుంచి అసలు కథ ప్రారంభమవుతుంది. గోడపల్లిలంక అనే కుగ్రామం. కనీసం రవాణా సౌకర్యం కూడా ఉండదు. పడవల ద్వారా ఏరు దాటితే గోడపల్లిలంక వస్తుంది. కనీసం ఆ గ్రామానికి కరెంట్ కూడా ఉండదు. చదువంటే ఏంటో కూడా ఆ గ్రామానికి తెలియదు. అలాంటి గ్రామంలో ఉండే సాగర్ (రామ్ పోతినేని)ను ఎలాగైనా చదివించాలని అతని తండ్రి (రావు రమేష్) భావిస్తాడు. స్కూలుకు వెళితే భయంతో అతనికి మాట రాదు. దీంతో టీచర్ అతడిని స్కూల్లో చేర్చుకునేందుకు నిరాకరిస్తాడు. తండ్రి బాగా కొడతాడు. ఆ సమయంలో సాగర్‌కు సూర్య సినిమాలోని డైలాగ్స్ టేప్‌రికార్డర్ ద్వారా వినిపిస్తాయి. దాంతో స్ఫూర్తి పొందిన సాగర్ టీచర్‌ను మెప్పించి స్కూలులో జాయిన్ అవుతాడు. అప్పటినుంచి హీరో వర్షిప్ ప్రారంభమవుతుంది. అది చివరికి దేనికి దారి తీసింది? ఆ తరువాత హీరో సూర్య, అభిమాని సాగర్ కథ ఏ మలుపు తీసుకుంది? వంటి అంశాలతో సినిమా సాగుతుంది.

సినిమా ఎలా ఉందంటే..

హీరో అనేవాడు అద్దాల మేడలోనే ఉండాలి లేదంటే పల్లకిని మోసే అభిమానులు సైతం కిందకు దించేసి చేతులు దులిపేసుకుంటారన్న భావనలో హీరో ఉంటాడు.. తనకు స్ఫూర్తిదాయకంగా నిలిచిన హీరో కోసం ఏదైనా చేసేందుకు వెనుకాడని అభిమాని మధ్య జరిగిన కథే ‘ఆంధ్రకింగ్ తాలుకా’. హీరో వర్షిప్.. యూత్‌ని ఇప్పుడు చూస్తూనే ఉన్నాం. హీరోలంతా బాగుంటారు. కానీ ఫ్యాన్ వార్ మాత్రం బీభత్సంగా జరుగుతుంటుంది. దీనికి కారణం హీరో వర్షిప్. అంటే హీరోని భగవంతుడిలా ఆరాధించడమన్నమాట. ఇలాంటి కథలు గతంలోనూ వచ్చాయి కానీ ఇది కొంచెం ఎక్స్‌ట్రీమ్ లెవల్ అని చెప్పాలి. స్టార్టింగ్ ఒక పావుగంట బాగానే నడుస్తుంది కానీ కథలోకి వెళ్లేకొద్దీ ఏదో టీవీ సీరియల్ చూస్తున్నామా? అనే భావన కలుగుతూ ఉంటుంది. ఫస్ట్ హాఫ్ హీరో, హీరోయిన్‌ల పరిచయం, ప్రేమ వంటివి చూపించిన దర్శకుడు.. సెకండాఫ్‌పై మాత్రం కాస్త ఇంట్రస్ట్ చూపించాడు. కథలో కమెడియన్ సత్యను ఇన్వాల్వ్ చేసి కాస్త నవ్వు తెప్పించాడు. ఇలాంటి కథ కాస్త కొత్తదే అయినా కూడా నేచురాలిటీకి చాలా దూరంగా ఉంటుంది.

ఎవరెలా నటించారంటే..

రామ్ పోతినేతి నటన చాలా బాగుంది. భాగ్యశ్రీ బోర్సే విషయానికి వస్తే నటన బాగున్నా కూడా ఆమెకు డబ్బింగ్ ఏమాత్రం సెట్ కాలేదు. ఇక రావురమేష్, మురళీ శర్మ, రాహుల్ రామకృష్ణ తమ పాత్రల్లో అద్భుతంగా నటించారు. మిగిలిన వారంతా తమ పాత్ర పరిధి మేరకు బాగానే నటించారు.

టెక్నికల్ పరంగా..

ఈ సినిమాకు వివేక్ & మెర్విన్ అందించిన సంగీతం చాలా ప్లస్ అయింది. స్క్రీన్‌ప్లే అంత అద్భుతమేమీ కాదు. ఇక ఎడిటింగ్ కూడా సరిగా లేదు.

ఫైనల్‌గా.. అంతగా ఆకట్టుకోని ‘ఆంధ్రా కింగ్ తాలుకా’.

రేటింగ్: 2.5/5

ప్రజావాణి చీదిరాల