AP Politics: ‘డీకే’లా ‘పీకే’ మారితే చంద్రబాబు పరిస్థితేంటి?

హెడ్డింగ్ చూడగానే.. ఎవరీ డీకే (DK), పీకే (PK) అనే డౌట్ వచ్చింది కదూ? అవునండోయ్, వీళ్లిద్దరూ మీకు బాగా తెలిసిన ప్రముఖులే. ఇందులో ఒకరు డీకే శివకుమార్ (DK Shivakumar) (కర్ణాటక డిప్యూటీ సీఎం) కాగా, ఇంకొకరు కొణిదెల పవన్ కళ్యాణ్ (Pawan Kalyan) (ఆంధ్రప్రదేశ్ డిప్యూటీ సీఎం). కర్ణాటకలో కాంగ్రెస్ ప్రభుత్వాన్ని (Congress Government) అధికారంలోకి తీసుకురావడంలో కీలక పాత్ర పోషించిన డీకే శివకుమార్, ఆ తర్వాత ముఖ్యమంత్రి పీఠాన్ని పంచుకోవాలంటూ (సీఎం షేరింగ్) గట్టిగా డిమాండ్ చేసి తన సత్తా ఏంటో దేశానికి చూపించారు.

ఆర్థిక బలం, అపారమైన ప్రజాకర్షణ, ఎలాంటి వారిని అయినా నొప్పించకుండా ఒప్పించగలిగే రాజకీయ చాణక్యంతో డీకే.. కర్ణాటక కాంగ్రెస్‌కు, పార్టీ గెలుపులో కర్త, కర్మ, క్రియ వన్ అండ్ ఓన్లీ లీడర్‌గా నిలిచారు. ఇప్పుడు, అదే తరహా వ్యూహంతో ఆంధ్రప్రదేశ్ ఉప ముఖ్యమంత్రి, జనసేన అధినేత కొణిదెల పవన్ కళ్యాణ్ (పీకే) గనుక ముందడుగు వేస్తే.. టీడీపీ అధినేత, ముఖ్యమంత్రి చంద్రబాబు నాయుడు (CM Chandrababu) పరిస్థితి ఏంటి? అనే ప్రశ్న రాష్ట్ర రాజకీయ వర్గాల్లో, అభిమానులలో పెద్ద చర్చకు దారితీసింది.

ఏపీలో గేమ్ ఛేంజర్

వాస్తవానికి.. పీకే ఏమీ తక్కువేం కాదు! 2024 ఎన్నికల్లో కూటమి పార్టీలు అధికారంలోకి రావడానికి పవన్ కళ్యాణ్ (Pawan Kalyan) పాత్ర అత్యంత కీలకమన్న విషయంలో ఎలాంటి సందేహాలు అక్కర్లేదు. ఆయన్ను చూసే ఒక బలమైన సామాజిక వర్గం కూటమి పార్టీలకు ఓటు వేసింది. వాస్తవానికి, ఏపీలో గెలుపు ఓటములు నిర్ణయించేది సామాజిక వర్గ సమీకరణమే. పవన్ (Pawan) తన చరిష్మాతో, స్థిరమైన నిబద్ధతతో కూటమి విజయానికి బలమైన పునాది వేశారు. కర్ణాటక రాజకీయాల్లో డీకే శివకుమార్ డిమాండ్‌లు, అలకలు, ఎమ్మెల్యేల మద్దతు కూడగట్టడం.. అంతా చూశాం. మొదట సీఎం పీఠం షేరింగ్ అడగడం, ఆఖరికి సిద్ధరామయ్య అలక, ఢిల్లీ పాలిటిక్స్ వరకు వెళ్లినా డీకే వెనక్కి తగ్గలేదు. ప్రస్తుతానికి సిద్ధరామయ్యతో తేనీటి విందుతో రాజీ కుదిరినప్పటికీ, డీకే చూపించిన పవర్ ఫుల్ పొలిటికల్ మూవ్ ఏపీ రాజకీయాలకు ఒక ప్రశ్నగా మారింది. ‘ఛాన్స్ వచ్చినప్పుడు వినియోగించుకోవాలి కదా? డిమాండ్ చేస్తే తప్పేంటి?’ అని జనసేన కార్యకర్తలు, అభిమానులు పవన్‌కు సూచిస్తున్నట్టు టాక్. ప్రస్తుతం కూటమి ప్రభుత్వం ఏర్పాటై రెండు సంవత్సరాలు పూర్తి కావొస్తున్నాయి. అయితే, అవసరమైతే లోకేష్‌ను సీఎంగా చంద్రబాబు తీసుకుంటాడే కానీ, పవన్‌కు నో ఛాన్స్ అనేది సాధారణంగా వినిపించే మాట అని రాజకీయ విశ్లేషకులు అభిప్రాయపడుతున్నారు.

మిత్రుడా.. వారసుడా?

చంద్రబాబు రాజకీయ జీవితంలో నారా లోకేష్ (Nara Lokesh) స్థానం కేవలం ఒక యువ నాయకుడిది మాత్రమే కాదు. లోకేష్, టీడీపీకి వారసుడు (Political Heir), నందమూరి-నారా కుటుంబాల వారసత్వాన్ని, పార్టీ భవిష్యత్తును కొనసాగించే వంశోద్ధారకుడు. ఈ భావోద్వేగపరమైన, రాజకీయపరమైన కారణాల వల్ల, పవన్ కళ్యాణ్ (పీకే) లాంటి బలమైన మిత్రుడిని కూడా పక్కన పెట్టి, లోకేష్‌కు సీఎం సీటు ఇవ్వడానికి చంద్రబాబు మొగ్గు చూపవచ్చు. టీడీపీ స్థాపించిన ఎన్టీఆర్ వారసత్వం, ఆయన అల్లుడిగా చంద్రబాబుకు అందింది. ఆ వారసత్వాన్ని, అధికారాన్ని, పార్టీ నాయకత్వాన్ని లోకేష్‌కి బదలాయించడం సీబీఎన్ (CBN) ప్రధాన లక్ష్యం. లోకేష్‌ను ముఖ్యమంత్రిని చేయడం ద్వారానే.. తమ కుటుంబ రాజకీయ వారసత్వాన్ని సుస్థిరం చేయగలుగుతారు. పవన్ కళ్యాణ్‌కి సీఎం సీటు ఇస్తే, అది పార్టీపై, కుటుంబంపై పట్టు కోల్పోయే ప్రమాదాన్ని సృష్టిస్తుంది. పవన్ ఎంత మిత్రుడైనా, ఆయన జనసేనకు అధినేత. ఆయన సొంత లక్ష్యాలు, అజెండాలు ఉంటాయి. డీకే శివకుమార్ కర్ణాటకలో సీఎం సీటు కోసం డిమాండ్ చేసినట్లుగా, పీకే కూడా ఎప్పుడైనా సొంత పార్టీ బలాన్ని ఉపయోగించి పట్టుబట్టే అవకాశం ఉంటుంది. కానీ, లోకేష్‌ విషయంలో ఈ సమస్య ఉండదు. వారసుడి ద్వారా అధికారాన్ని నడపడం అనేది చంద్రబాబుకు పూర్తి సుస్థిరత, నియంత్రణను ఇస్తుంది.

పీకేకు నో ఛాన్స్

అయితే, పొరపాటున పీకే తిరగబడి, డీకేలా పట్టుబడితే చంద్రబాబు పరిస్థితి ఏంటి? అనే ప్రశ్నకు సమాధానం ఇప్పుడు చూద్దాం. పవన్‌ సీటు షేర్ అడిగితే చంద్రబాబు మాత్రం 100కు వెయ్యి శాతం నో అనే చెబుతారు. ఏపీ అసెంబ్లీలో మొత్తం 175 స్థానాలకు గాను, టీడీపీ-జనసేన-బీజేపీ (TDP-Janasena-BJP) కూటమి ఏకంగా 164 స్థానాలను కైవసం చేసుకుంది. ఈ విజయంలో టీడీపీ 135 సీట్లు, జనసేన 21 స్థానాలు, బీజేపీ 8 నియోజకవర్గాల్లో విజయం సాధించాయి. చంద్రబాబుకు గట్టి ధైర్యం ఇచ్చేది టీడీపీకి సొంతంగానే సంపూర్ణ మెజారిటీ 135 అసెంబ్లీ స్థానాలు ఉండడం. ఈ బలం ముందు, పవన్ కళ్యాణ్ గనక డిమాండ్లతో ముందుకు వస్తే, చంద్రబాబు వేరే వ్యూహంతో ముందుకు వెళ్లవచ్చు. ఇంకా సింపుల్‌గా చెప్పాలంటే టీడీపీకి 135 మంది ఎమ్మెల్యేల బలం ఉన్నందున, జనసేన 21 మద్దతు లేకపోయినా ప్రభుత్వానికి వచ్చిన నష్టం ఏమీ ఉండదు. అవసరమైతే, పవన్‌ను పక్కనపెట్టే సాహసం చేయగలరు.

పవన్‌కు సీఎం సీటు ఇస్తే..?

టీడీపీకి ఉన్న ఎమ్మెల్యేలలో ఎక్కువగా చంద్రబాబు, లోకేష్‌లకు విధేయులుగా మాత్రమే ఉంటారు, ఉన్నారు కూడా. పార్టీపై చంద్రబాబుకు పట్టు ఏ మాత్రం సడలదు. అదే పవన్‌కు ముఖ్యమంత్రి సీటు ఇస్తే, టీడీపీలోని ఎమ్మెల్యేలలో వర్గ విభేదాలు, అసంతృప్తి మొదలయ్యే ప్రమాదం ఉన్నది. ఈ పరిస్థితులను నివారించడానికి, సొంత పార్టీ బలాన్ని కాపాడుకోవడానికి వారసుడికి అవకాశం ఇవ్వడం సరైన వ్యూహంగా చంద్రబాబు భావించవచ్చు. ఇక ఎలాగో కేంద్రంలో బలంగా ఉన్న బీజేపీతో మాత్రం కలిసే ఉంటారు. రాష్ట్రానికి నిధులు కావాల్సి ఉన్నది.. ఇప్పుడిప్పుడే అమరావతి ప్రాజెక్టు ప్రారంభం, అప్పులు, నిధులు కావాలి కాబట్టి కమలంతో సైకిల్ కలిసే ఉంటుంది ఇందులో ఎలాంటి సందేహం అక్కర్లేదు. ఏదేమైనప్పటికీ, రాష్ట్ర రాజకీయాలలో ఎప్పుడు ఎలాంటి ఎటువంటి అనూహ్య మలుపులు చోటు చేసుకుంటాయో ఎవరికి ఎరుక.. లెట్స్ వెయిట్ అండ్ సీ!

ప్రజావాణి చీదిరాల